लाईव्ह महाराष्ट्र न्यूज: नात्याला काळीमा फासणारी घटना समोर आली आहे. पोटच्या मुलीवर नराधम बापाने अत्याचार केल्याचा प्रकार खेड तालुक्यात घडला आहे. राजगुरूनगर जिल्हा व अतिरिक्त सत्र न्यायालयाने शुक्रवारी (दि. १२) जन्मठेपेची शिक्षा सुनावली.
खेड तालुक्यातील दुर्गम गावात १३ वर्षीय मुलीवर वडिलांनी अत्याचार केल्याची घटना घडली होती.पीडित मुलगी इयत्ता आठवीत शिकत आहे. कुटुंबातील आई भाऊ बाहेरगावी गेले असताना दारूच्या नशेत रात्री नराधम वडिलांनी आपल्या मुलीवर अत्याचार केला. लहान भावाशेजारी झोपलेल्या मुलीला दुसऱ्या खोलीत नेऊन नराधम पित्याने जीवे मारण्याची धमकी देत मुलीवर अत्याचार केला. मुलगी व आईच्या तक्रारीनंतर ११ फेब्रुवारीला आरोपीला खेड पोलिसांनी अटक केली होती. तेव्हापासून तो येरवडा तुरुंगात आहे.
खेड तालुक्यातील एका गावात नराधम वडील आई, दोन भाऊ आणि इयत्ता आठवीत शिकणारी पीडित मुलगी असा एकत्र परिवार राहत होता. राजगुरूनगर सत्र न्यायालयात न्यायाधीश एस एन राजूरकर यांच्या कोर्टात हा खटला सुरू होता. खटल्यात एकूण १२ साक्षीदार तपासण्यात आले. त्यात पीडित मुलगी, आई व डॉक्टर यांच्या महत्त्वाच्या साक्ष गृहीत धरून आरोपीला न्यायाधीश एस एन राजूरकर यांनी जन्मठेप व दहा हजार रुपये दंड अशी शिक्षा सुनावली.
