नागपुरात खळबळ उडाली आहे. एक अत्यंत दुर्दैवी घटना समोर आली आहे. अंत्यसंस्कारावेळी अग्नी देताना आगीचा भडका उडाला. यावेळी तिथे असलेले तीन जण जखमी झाले. मात्र त्यापैकी दोघांचा मृत्यू झाला. तर एकाची प्रकृती गंभीर असल्याची माहिती मिळाली आहे.
गुरुवारी सायंकाळी नागपूर कामठीच्या राणी तलाव मोक्षधाम येथे स्थानिक रहिवासी सिद्धार्थ हुमणे यांचा अपघाती मृत्यू झाला होता. त्यांच्या पार्थिवावर अंत्यसंस्कार करण्यासाठी गेलेले असता त्यावेळी अग्नी देताना हा प्रकार घडला. आगीत तीन जण गंभीर होरपळले. अग्नी देण्यासाठी डिझेलचा वापर करण्यात आला होता. त्यामुळे डिझेलचा भडका उडाल्याने ही दुर्दैवी घटना घडल्याची माहिती मिळाली आहे. या घटनेनंतर जखमींना रुग्णालयात उपचारासाठी दाखल करण्यात आलं. दिलीप गजभिये आणि सुधीर डोंगरे अशी मृतकांची नावे आहेत.
यामध्ये सुधीर महादेव डोंगरे, सुधाकर खोब्रागडे आणि दिलीप घनश्याम गजभिये हे तिघेजण गंभीररित्या भाजले होते. गंभीर रित्या जखमी झालेल्या तिघांनाही उपचाराकरता रुग्णालयात दाखल करण्यात आले होते.या घटनेनंतर कामठी परिसरामध्ये हळहळ व्यक्त करण्यात येत आहे. नवीन कामठी पोलीस याप्रकरणी तपास करत आहे.
