लाईव्ह महाराष्ट्र न्यूज: नवनिर्वाचित राष्ट्रपती द्रौपदी मुर्मू यांची दिल्ली येथे भेट घेऊन कांदाप्रश्नावर केंद्र सरकारने कायमस्वरूपी तोडगा काढावा, यासाठी त्यांना साकडे घातले जाणार आहे.कांदा उत्पादक संघटनेकडून त्यांना एक टन कांदाही भेट देण्यात येणार असल्याची माहिती महाराष्ट्र राज्य कांदा उत्पादक शेतकरी संघटनेचे संस्थापक अध्यक्ष भारत दिघोळे यांनी दिली.
देशात कांद्याच्या दरात घसरण झाल्याने शेतकर्‍यांना उत्पादन खर्चापेक्षा कमी दराने कांद्याची विक्री करावी लागत आहे. देश स्वातंत्र्याचा अमृतमहोत्सव साजरा करीत असताना कृषिप्रधान म्हणून ओळखले जाणारे देशामध्ये कांद्याला सतत मातीमोल भाव मिळत असतो. शेतकर्‍यांवर कर्जाचा डोंगर वाढत चाललेला आहे. आजमितीस शेतकर्‍यांनी साठवणूक केलेल्या उन्हाळी कांद्याला सरासरी नऊ ते दहा रुपये प्रतिकिलो दर मिळत आहे.
कांदा उत्पादक शेतकर्‍यांना कांद्याची नियमित बाजारपेठ मिळवून द्यावी तसेच देशांतर्गत कांद्याचे दर निश्चित करून द्यावे. यासाठी नवनिर्वाचित राष्ट्रपती द्रौपदी मुर्मू यांनी केंद्र सरकारला सूचना कराव्यात, यावेळी नवनिर्वाचित राष्ट्रपती मुर्मू यांना संघटनेच्या वतीने एक टन कांदा भेट म्हणून देणार असल्याचेही दिघोळे यांनी सांगितले. एक शिष्टमंडळ दिल्लीमध्ये नवनिर्वाचित राष्ट्रपती श्रीमती मुर्मू यांची भेट घेणार असल्याची माहिती राज्य कांदा उत्पादक शेतकरी संघटनेचे संस्थापक अध्यक्ष भारत दिघोळे यांनी दिली आहे.
