जळगाव : प्रतिनिधी
आम्हीच जळगावचे डॉन… आत्ताच जेलमधून बाहेर आले असून कोणी पुढे आले तर मुडदे पाडू असे म्हणत चार ते पाच जणांच्या टोळके हातात कोयते घेवून अरुणाबाई करतार पवार (वय ५०, रा. सुरेशदादा जैन नगर, कुसुंबा, ता. जळगाव) यांच्या घरात प्रवेश केला. त्यानंतर घरातील साहित्याची तोडफोड करीत नुकसान केले. ही घटना दि. २१ रोजी दुपारी ४ वाजता कुसुंबा येथे घडली. याप्रकरणी एमआयडीसी पोलिसात गुन्हा दाखल करण्यात आला आहे.
तालुक्यातील कुसुंबा येथील सुरेशदादा जैन नगरात अरुणाबाई पवार या वास्तव्यास आहे. दि. २१ मार्च रोजी जून्या भांडणाच्या कारणावरुन चार ते पाच जणांच्या टोळके हातात कोयत्या सारखे हत्यार घेवून पवार यांच्या घराचे कुलूप तोडून त्यांच्या घरात प्रवेश केला. त्यानंतर आरडाओरड करीत योगेश कुठे आहे त्याला आम्ही सोडणार नाही, असे म्हणून त्यांनी कोयत्याने घरातील भांड्याची तोडफोड करुन नुकसान केले. तसेच आम्ही जळगावचे डॉन आहोत, आत्ताच जेलमधून बाहेर आलो आहे कोणी पुढे आले तर एक-एकाचे मुडदे पाडू अशी धमकी दिली. याप्रकरणी अरुणाबाई पवार यांनी दि. २२ रोजी एमआयडीसी पोलिसात तक्रार केली. त्यानुसार चार ते पाच जणांच्या टोळक्याविरुद्ध गुन्हा दाखल करण्यात आला आहे. तपास उपनिरीक्षक राहूल तायडे हे करीत आहे.
