नाशिक : वृत्तसंस्था
सामाजिक कार्यकर्त्या तृप्ती देसाई यांनी नाशिकच्या तत्कालीन आयजी दत्तात्रय कराळे आणि महिला आयोगाच्या तत्कालीन अध्यक्षा रुपाली चाकणकर यांच्यावर गंभीर आरोप केले आहेत.
तृप्ती देसाई म्हणाल्या की, अशोक खरात हा दत्तात्रय कराळे यांचा गुरू होता, त्यामुळे त्यांनी खरातला पाठिशी घालणे शक्य आहे, परंतु त्यांच्यावर कशी कारवाई होईल? तसेच, त्यांनी भोंदू अशोक खरातच्या एन्काउंटरची भीती व्यक्त केली.
बोलताना सांगितले की, अनेक बडे नेते, आमदार, खासदार, आयएएस अधिकारी अशोक खरातच्या संपर्कात होते आणि त्यांच्यात आर्थिक संबंध देखील होते. “या सर्वांची नावे बाहेर येऊ नयेत म्हणून एकच मार्ग उरतो – खरातला संपवणे,” असे तृप्ती देसाई म्हणाल्या. त्यामुळे अशोक खरातचा एन्काउंटर होण्याची शक्यता आहे, आणि त्यांनी मुख्यमंत्री देवेंद्र फडणवीस यांना या रॅकेटला उद्ध्वस्त करण्याचे आवाहन केले आहे.
गतवर्षी मार्चमध्ये श्रीरामपूरमधील एका दैनिकात अशोक खरातशी संबंधित बातमी आली होती. त्यावेळी काही व्हिडिओ तृप्ती देसाईंकडे येणार होते, परंतु महिला आयोगाच्या तत्कालीन अध्यक्षा रुपाली चाकणकर यांनी दबाव आणल्याने ते देणे टाळले गेले. नंतर 5 मार्च रोजी पेनड्राईव्ह पोलिसांकडे पाठवण्यात आला आणि पुढील कारवाई सुरू झाली.
तृप्ती देसाई यांनी आयजी दत्तात्रय कराळे यांच्यावर आरोप केले की, त्यांनी वारंवार खरातला पाठिशी घातले आणि त्यामुळे त्याची हिंमत वाढली. तसेच, रुपाली चाकणकर यांनी पीडित महिलांसाठी एकही फोन केला नाही आणि पत्रकारांवर दबाव टाकून प्रकरण दाबले.
सध्या अशोक खरातला अटक झाली असून, मुख्यमंत्री देवेंद्र फडणवीस यांनी या प्रकरणात कायदेशीर कारवाई करण्याचे आश्वासन दिले आहे. तृप्ती देसाई म्हणाल्या की, “सरकारसाठी महिलांची प्रतिष्ठा अत्यंत महत्त्वाची आहे. आता पुढे काय कारवाई होते, हे पहावे लागेल.”
