भुसावळ : प्रतिनिधी
ऑक्सिजन आणि केमिकलसह औद्योगिक साहित्य वाहून नेणाऱ्या मिनी ट्रकला भीषण आग लागून तीनवेळा स्फोट झाल्याची धक्कादायक घटना घडली. स्फोटांच्या आवाजामुळे परिसरात काही काळ भीतीचे वातावरण निर्माण झाले होते. सुदैवाने चालकाने प्रसंगावधान राखून ट्रकमधून उडी मारल्याने कोणतीही जीवितहानी झाली नाही. ही थरारक घटना तालुक्यातील भुसावळ-जामनेर मार्गावर कुन्हे पानाचे गावाजवळ शुक्रवारी सकाळी ११:१५ वाजता घडली. दरम्यान, ट्रकला आग लागल्याचे लक्षात येताच चालक उमेश रमेश जाधव (रा. हातनूर, ता. कन्नड, जि. संभाजीनगर) यांनी प्रसंगावधान राखून तत्काळ ट्रकमधून उडी मारून स्वतःचा जीव वाचविला.
मिळालेल्या माहितीनुसार, मिनी ट्रक (क्र. एमएच २० ईएल ८४६७) हा औद्योगिक साहित्य, सिलिंडर तसेच इतर साहित्य घेऊन जात होता. शुक्रवारी (दि. १३) सकाळी सुमारे ११:१५ वाजण्याच्या सुमारास कुन्हा ते जामनेर मार्गावर हॉटेल राजगडसमोर ट्रकच्या मागील भागातील सामानाला अचानक आग लागली. काही क्षणांतच आगीने भीषण रूप धारण केले. आग लागल्यानंतर ट्रकमधील टँकचे तीन मोठे स्फोट झाले. या स्फोटांमुळे मोठा आवाज होऊन परिसर हादरला. स्फोटांचा धोका लक्षात घेऊन जामनेर-भुसावळ मार्गावरील वाहतूक तातडीने थांबवण्यात आली. सुरक्षिततेच्या दृष्टिकोनातून सुमारे दोन तास हा मार्ग पूर्णपणे बंद ठेवण्यात आला होता. त्यामुळे या मार्गावरील वाहतुकीवर मोठा परिणाम झाला.
घटनेची माहिती मिळताच पोलिस तातडीने घटनास्थळी पोहोचले. त्याचबरोबर जामनेर येथील अग्निशमन दलालाही पाचारण करण्यात आले. भुसावळ नगरपरिषदेच्या अग्निशमन दलानेही तत्काळ घटनास्थळी दाखल होत आगीवर नियंत्रण मिळविण्यासाठी प्रयत्न सुरू केले. मोठ्या शर्थीने अग्निशमन दलाने आगीवर नियंत्रण मिळवले. यावेळी भुसावळ नगरपरिषदेचे अग्निशमन अधिकारी विवेक माकोडे, कर्मचारी गजेंद्र जावळे तसेच अन्य अग्निशमन कर्मचारी घटनास्थळी उपस्थित होते.
