जळगाव : प्रतिनिधी
महिला व बालकांच्या सुरक्षिततेसाठी तसेच तक्रार निवारणासाठी महत्त्वपूर्ण ठरणाऱ्या ‘भरोसा सेल व समुपदेशन केंद्रा’च्या नवीन इमारतीचे भूमिपूजन आज (दि. ८ मार्च) जळगाव पोलीस अधीक्षक कार्यालयाच्या परिसरात उत्साहात संपन्न झाले. जळगाव जिल्ह्याचे पालकमंत्री तथा पाणीपुरवठा व स्वच्छता मंत्री गुलाबराव पाटील यांच्या हस्ते हा भूमिपूजन सोहळा पार पडला.
कार्यक्रमाची सुरुवात जळगावचे पोलीस अधीक्षक डॉ. महेश्वर रेड्डी यांच्या प्रास्ताविकाने झाली. त्यांनी या केंद्राच्या उभारणीमागील उद्देश स्पष्ट करताना महिला व बालकांना एकाच ठिकाणी कायदेशीर मदत, मानसिक समुपदेशन आणि पोलिसांचे तातडीचे सहाय्य उपलब्ध करून देण्याची सुविधा या केंद्रातून मिळणार असल्याचे सांगितले. कार्यक्रमाचे सूत्रसंचालन व आभार प्रदर्शन जळगाव उपविभागाचे उपविभागीय पोलीस अधिकारी नितीन गणापुरे यांनी केले.
या कार्यक्रमास पोलीस प्रशासनातील अनेक मान्यवर उपस्थित होते. यामध्ये अपर पोलीस अधीक्षक अशोक नखाते, जिल्हा विशेष शाखेचे पोलीस निरीक्षक सतीश गोराडे, स्थानिक गुन्हे शाखेचे पोलीस निरीक्षक राहुल गायकवाड, तसेच जळगाव शहरातील सर्व पोलीस ठाण्यांचे प्रभारी अधिकारी व पोलीस कर्मचारी उपस्थित होते.
या प्रकल्पासाठी जिल्हा नियोजन समिती (DPDC) निधीतून सुमारे २ कोटी ९७ लाख रुपयांच्या अंदाजपत्रकास मंजुरी देण्यात आली आहे. या निधीतून उभारण्यात येणारी इमारत अत्याधुनिक सुविधांनी सज्ज असणार आहे. सार्वजनिक बांधकाम विभाग, जळगाव यांच्या देखरेखीखाली या प्रकल्पाची अंमलबजावणी करण्यात येणार असून, कार्यकारी अभियंता राहुल पाटील आणि उपविभागीय अधिकारी सुनील देवरे यांच्या मार्गदर्शनाखाली मे. जगन्नाथ इन्फ्रा कंपनी, चाळीसगाव यांच्यामार्फत बांधकाम पूर्ण केले जाणार आहे.
महिला व बालकांच्या संरक्षणासाठी आणि त्यांच्या समस्यांचे संवेदनशील पद्धतीने निराकरण करण्यासाठी उभारण्यात येणारे हे भरोसा सेल व समुपदेशन केंद्र सामाजिक सुरक्षिततेच्या दृष्टीने महत्त्वपूर्ण पाऊल ठरणार असल्याचे मत व्यक्त करण्यात आले. यावेळी पालकमंत्री गुलाबराव पाटील यांनी जळगाव पोलीस दलाच्या या उपक्रमाचे कौतुक करत समाजहितासाठी अशा उपक्रमांची गरज अधोरेखित केली.
