मुंबई : वृत्तसंस्था
शिवसेना शिंदे गटाचे खासदार डॉ. श्रीकांत शिंदे यांनी भाजप नेते व मंत्री गणेश नाईक यांच्यावर जोरदार टीका केली आहे आणि खुल्या आव्हानाद्वारे ठाणे किंवा कल्याण लोकसभेतून निवडणूक लढवण्यास सांगितले आहे. “तुम्ही शिंदे साहेबांच्या नादी लागा, पण माझ्या नादी लागू नका,” असे श्रीकांत शिंदे यांनी स्पष्ट केले.
दरम्यान, उपमुख्यमंत्री एकनाथ शिंदे आणि मंत्री गणेश नाईक यांच्यातील वाद सर्वश्रुत आहेत. गणेश नाईक यांनी श्रीकांत शिंदे यांना वयावरून टोला दिला होता. त्यावर पलटवार करत श्रीकांत शिंदे म्हणाले, “वयाच्या हिशोबाने आजार होत असतात; विसरभोळेपणा, चिडचिड, दिशाभूल यासारखे आजार होतात. हे मी सांगू शकतो कारण मी डॉक्टर आहे.”
श्रीकांत शिंदे यांनी स्पष्ट केले की, माजी खासदार करण्याचे वक्तव्य नाईकांनी करू नये; “जर जास्तच खुमखुमी असेल तर ठाणे किंवा कल्याण लोकसभेतून तुम्ही किंवा तुमच्या मुलाने निवडणूक लढवून दाखवा. मी तुमच्यासमोर उभा राहील.” श्रीकांत शिंदे यांना तीन वेळा लोकांनी निवडून दिले आहे, असेही त्यांनी नमूद केले.
दरम्यान, महाशिवरात्रीच्या पावन पर्वावर डॉ. श्रीकांत शिंदे यांनी अंबरनाथ येथील प्राचीन शिवमंदिरात शिवलिंगाला मनोभावे दुग्धाभिषेक केला. तेथे त्यांनी शिवमंदिर कॉरिडॉर विकासकामांचा उल्लेख करत, येणाऱ्या काळात हा कॉरिडॉर देशभरातील भाविकांसाठी आकर्षणाचे केंद्र ठरेल आणि पर्यटनाला चालना मिळेल, असा ठाम विश्वास व्यक्त केला. या वादामुळे पुन्हा एकदा शिंदे गट व भाजप यांच्यातील राजकीय तणाव वाढण्याची शक्यता आहे.
