जळगाव : प्रतिनिधी
शहरातील सुवर्ण बाजारात गेल्या काही दिवसांपासून सुरू असलेल्या दरवाढीच्या मालिकेला अखेर ब्रेक लागला असून, सोने व चांदीचे दर विक्रमी पातळीच्या खाली आले आहेत. गेल्या पंधरा दिवसांच्या तुलनेत सोन्याचे दर तब्बल २३ हजार रुपये, तर चांदीचे दर १ लाख ३८ हजार रुपयांनी घसरले आहेत. यामुळे सर्वसामान्य ग्राहकांना दिलासा मिळाला असला, तरी चढ्या भावात गुंतवणूक केलेल्या गुंतवणूकदारांमध्ये चिंतेचे वातावरण आहे.
आंतरराष्ट्रीय पातळीवरील अनिश्चिततेत काही प्रमाणात घट झाल्याचे संकेत मिळत असल्याने सुरक्षित गुंतवणूक म्हणून सोन्याकडे पाहण्याचा कल कमी झाला आहे. त्यामुळे सोने व चांदीच्या दरांमध्ये होत असलेली दिवसागणिक वाढ थांबली आहे. जानेवारी महिन्याच्या शेवटच्या आठवड्यात या मौल्यवान धातूंनी उच्चांक गाठला होता. मात्र, सध्या जागतिक बाजारपेठेत स्थिरता येऊ लागल्याने सोन्याची मागणी घटली असून, त्याचा थेट परिणाम दरांवर दिसून येत आहे.
पंधरा दिवसांपूर्वी जळगाव शहरातील सुवर्ण बाजारात २४ कॅरेट सोन्याचा दर जीएसटीसह प्रति १० ग्रॅम १ लाख ८२ हजार ८२५ रुपये इतक्या उच्चांकावर पोहोचला होता. मात्र, शनिवारी (दि. ७) सोन्याचे दर जीएसटीसह प्रति १० ग्रॅम १ लाख ५९ हजार ५४७ रुपयांवर स्थिरावले. त्यामुळे या कालावधीत सोन्याच्या दरात २३ हजार २७८ रुपयांची घसरण झाली आहे.
चांदीच्या किमतींमध्येही मोठी घसरण पाहायला मिळाली आहे. गेल्या आठवड्यापर्यंत चांदीचा दर जीएसटीसह प्रति किलो ४ लाख ६ हजार ८५० रुपये इतक्या उच्चांकावर होता. मात्र, शनिवारी (दि. ७) सकाळी बाजार उघडताच चांदीचा दर जीएसटीसह प्रति किलो २ लाख ६८ हजार ८३० रुपये इतका नोंदविण्यात आला. त्यामुळे अवघ्या पंधरा दिवसांत चांदी तब्बल १ लाख ३८ हजार रुपयांनी स्वस्त झाली आहे.
