नवी दिल्ली : वृत्तसंस्था
मागील काही दिवसांपासून सोन्या-चांदीच्या दरात लक्षणीय घट होताना दिसत असून, अर्थसंकल्पानंतर या घसरणीला आणखी वेग आला आहे. त्यामुळे सोने-चांदीच्या दागिन्यांची किंवा गुंतवणुकीची योजना करणाऱ्यांसाठी ही खरेदीची चांगली संधी मानली जात आहे. आज, सोमवारी सकाळी 10:35 वाजता एमसीएक्सवर सोन्याच्या किमतीत ₹2,289 म्हणजेच 1.55 टक्क्यांची घसरण नोंदवण्यात आली. या घसरणीनंतर 24 कॅरेट सोन्याची किंमत प्रति 10 ग्रॅम ₹1,45,464 इतकी झाली आहे.
चांदीच्या दरात तर अधिक तीव्र घसरण पाहायला मिळाली. सोमवारी चांदीच्या किमतीत ₹18,355 म्हणजेच 6.91 टक्क्यांची घसरण झाली. यानंतर चांदीची किंमत प्रति किलो ₹2,47,297 वर आली आहे. विशेष म्हणजे अवघ्या दोन दिवसांपूर्वी चांदीचा दर ₹4 लाख प्रति किलो या विक्रमी पातळीवर पोहोचला होता.
गुंतवणूकदारांना अर्थसंकल्पात आयात शुल्क (सीमाशुल्क) कमी होण्याची अपेक्षा होती. मात्र त्यात कोणताही बदल न झाल्याने तसेच एसटीटी आणि इतर कर नियम अधिक कडक करण्यात आल्याने संपूर्ण वित्तीय बाजारात भीतीचे वातावरण निर्माण झाले. याचा परिणाम म्हणून गुंतवणूकदारांनी मोठ्या प्रमाणावर सोने आणि चांदीची विक्री सुरू केली.
गेल्या वर्षभरात सोन्याने सुमारे 75 टक्के, तर चांदीने तब्बल 167 टक्के परतावा दिला होता. इतक्या मोठ्या वाढीनंतर अचानक घसरण होण्याच्या भीतीने मोठ्या गुंतवणूकदारांनी आपली होल्डिंग्ज विक्रीस काढली. ही प्रक्रिया बाजारात ‘दीर्घ लिक्विडेशन’ म्हणून ओळखली जाते. दरम्यान, आंतरराष्ट्रीय स्तरावरही काही घटकांचा परिणाम दिसून येत आहे. अमेरिकेचे राष्ट्रपती डोनाल्ड ट्रम्प यांनी केविन वॉर्श यांची फेडरल रिझर्व्हच्या प्रमुखपदी नियुक्ती करण्याच्या चर्चेमुळे डॉलर निर्देशांक मजबूत झाला आहे. वॉर्श यांना व्याजदर वाढीचे समर्थक मानले जाते. मजबूत डॉलरमुळे आंतरराष्ट्रीय बाजारात सोन्याच्या किमतींवर दबाव येतो.
तांत्रिक विश्लेषणानुसारही सोने आणि चांदीच्या किमतींमध्ये जास्त खरेदीचे संकेत दिसत होते. आज सकाळी एमसीएक्सवर चांदीचे दर 17,000 ते 19,000 रुपयांनी घसरून गेल्या काही आठवड्यांतील नीचांकी पातळीवर पोहोचले. या सर्व घडामोडींमुळे सध्या सोन्या-चांदीच्या बाजारात मोठी उलथापालथ सुरू असून, पुढील काही दिवस दरांमध्ये चढ-उतार कायम राहण्याची शक्यता तज्ज्ञ व्यक्त करत आहेत.
