धरणगाव : प्रतिनिधी
तालुक्यातील पाळधी पोलीस व स्थानिक गुन्हे शाखा यांचा संयुक्त कारवाईत प्रतिबंधित असलेला गुटख्याचा कंटेनर पाठलाग करून पकडल्याने पाळधी परिसरात खळबळ उडाली आहे.
मिळालेल्या माहितीनुसार, पाळधी पोलीस व स्थानिक गुन्हे शाखा यांना आज दुपारी महामार्गावरून एक कंटेनर प्रतिबंधित असलेला गुटख्याची वाहतूक करत आहे, अशी माहिती मिळाली. यानुसार त्यांनी पाळत ठेवली. तर कंटेनर येताच तो थांबवण्यास सांगितले. मात्र तो कंटेनर न थांबताच पुढे गेला. त्यामुळे पाठलाग करून एरंडोल तालुक्यातील सावदे शिवारात या कंटेनरला पकडण्यात यश आले. त्यानंतर हा कंटेनर ताब्यात घेऊन पाळधी पोलीस चौकीत आणला.
या वेळी त्या कंटेनरमध्ये प्रतिबंधित गुटखा असल्याचे आढळले. त्यानंतर अन्न सुरक्षा अधिकारी शरद पवार यांना बोलावून पंचनामा करण्यात आला. त्यात १२८ गोण्या गुटखा होता. त्याची अंदाजे ४८ लाख २२ हजार २६४ किंमत असून २५ लाखाचा कंटेनर असा एकूण ७३ लाख २२ हजार २६४ रुपयांचा मुद्देमाल जप्त करण्यात आला आहे. यातील संशयित प्रदीप भाटू पाटील (वय ४९) यास ताब्यात घेण्यात आले आहे.
ही कारवाई पाळधी पोलीस चौकीचे स.पो.नि. प्रशांत कंडारे, एएसआय राजाराम सुरवाडे, योगेश सोनवणे, वसंत निकम, संदिप खंडारे, रवींद्र चौधरी, मोहन पाटील, रमेश सूर्यवंशी, भारत पाटील, स्थानिक गुन्हे शाखेचे पी.एस.आय. शरद बागल, ए.एस.आय. अतूल वंजारी, विजय पाटील, अक्रम शेख, रवी कापडणे यांच्या पथकाने केली. या वेळी धरणगावचे पो.नि. सुनील पवार यांनी भेट देऊन पाहणी केली. पाळधी पोलिसात प्रथमच एवढ्या मोठ्या प्रमाणात गुटख्याची करवाई झाल्याने परिसरात खळबळ उडाली आहे. येथे कारवाई होताच पाळधी येथे सुरु असलेले सर्व अवैध धंदे तत्काळ बंद होऊन त्यांनी कारवाईचा भितीने धूम ठोकली.
