जळगाव जिल्ह्यातील शिवसेना शिंदे गटाला मोठा धक्का बसला असून अमळनेरचे माजी आमदार शिरीष चौधरी यांना नंदुरबार पोलिसांनी अटक केली आहे. चौधरी यांच्यावर दरोडा तसेच अॅट्रोसिटी (अनुसूचित जाती-जमाती अत्याचार प्रतिबंधक कायदा) अंतर्गत गुन्हा दाखल असल्याने ही कारवाई करण्यात आली. या अटकेमुळे राज्याच्या राजकारणात मोठी खळबळ उडाली आहे.
नगरपालिका निवडणुकीनंतर माजी आमदार शिरीष चौधरी यांचे पुत्र प्रथमेश चौधरी यांची उपनगराध्यक्षपदी निवड झाली होती. या निवडीनंतर काढण्यात आलेल्या विजय मिरवणुकीदरम्यान दोन गटांमध्ये तणाव निर्माण झाला. वादाचे रूपांतर पुढे हाणामारीत झाले आणि परिस्थिती चिघळली. याच घटनेनंतर रात्री संतप्त जमावाने शिरीष चौधरी यांच्या निवासस्थानी तोडफोड केल्याची घटना घडली होती.
या प्रकरणानंतर दोन्ही गटांनी एकमेकांविरोधात पोलिस ठाण्यात तक्रारी दाखल केल्या. त्यामध्ये शिरीष चौधरी यांच्यावर दरोडा तसेच जातीय शिवीगाळ व धमकी दिल्याचा आरोप करत अॅट्रोसिटी अंतर्गत गुन्हा नोंदवण्यात आला होता. या गुन्ह्याच्या अनुषंगाने नंदुरबार पोलिसांनी आज चौधरी यांना ताब्यात घेतले आहे.
दरम्यान, चौधरी यांच्या फिर्यादीवरून दाखल झालेल्या गुन्ह्यातील काही आरोपींनाही पोलिसांनी अटक केली असून, दोन्ही बाजूंनी कायदेशीर कारवाई सुरू आहे. या संपूर्ण प्रकरणामुळे राजकीय वातावरण तापले असून, शिवसेना शिंदे गटासाठी हा मोठा राजकीय धक्का मानला जात आहे.
