भुसावळ प्रतिनिधी । तालुक्यातील हतनुर धरणातील पाण्याच्या पातळीत मोठी वाढ झाल्याने ४ दरवाजे पुर्णपणे उघडण्यात आले आहे तर २० दरवाजे १ मीटरने उघडले आहे.
हतनुर धरणाचे वरच्‍या भागात मागील काही दिवसांपासून पावसाची संततधार सुरू आहे. शिवाय मध्यप्रदेश, विदर्भात होत असलेल्या संततधार पावसामुळे हतनूर धरणाच्या पाणलोट क्षेत्रात पाण्याची आवक वाढली आहे. गेल्या तीन दिवसांपासून पाऊस सुरू असल्याने हतनूर धरण पाणलोट क्षेत्रात पाण्याच्या पातळीत मोठी वाढ झाली आहे. पाऊस सुरूच असल्याने धरणातील पाणी पातळी 209.68 मीटर इतकी झाली आहे यातून ३८ हजार १०५ क्युसेक्स पाण्याचा विसर्ग तापी नदीपात्रात केला जात आहे. जळगाव जिल्ह्यात देखील मागील दोन तीन दिवसांपासून हलक्या ते मध्यम स्वरूपाचा पाऊस सुरूच आहे. यामुळे तापी काठच्‍या गावांना सतर्कतेचा इशारा दिला आहे.
