जळगाव : प्रतिनिधी
आई साखरपुड्याला गेलेली असतांना निलेश मिलींद पाटील (वय २५, रा. ओंकार नगर) या तरुणाने राहत्या घरात गळफास घेत आत्महत्या केली. त्याची आई गावाहून घरी परतल्यानंतर त्यांना मुलगा गळफास घेतलेल्या अवस्थेत दिसताच त्यांनी एकच आक्रोश केला. ही घटना बुधवारी सायंकाळच्या सुमारास उघडकीस आली. तरुणाच्या आत्महत्येचे कारण अस्पष्ट असून याप्रकरणी पोलिसात अकस्मात मृत्यूची नोंद करण्यात आली आहे.
सविस्तर वृत्त असे कि. शहरातील ओंकार नगरात निलेश पाटील हा तरुण आईसह वास्तव्यास होता. दि. १७रोजी साखरपुड्याच्या कार्यक्रमाला गेलेली होती. त्यामुळे निलेश हा घरी एकटाच होता, त्याने घरी कोणीही नसतांना छताला गळफास घेत आपली जीवनयात्रा संपविली. सायंकाळी निलेशची आई घरी आल्यानंतर त्यांना घराचा दरवाजा आतून बंद होता. मात्र निलेश हा दरवाजा ठोठावून आणि आवाज देवूनही आतून प्रतिसाद देत नव्हता. त्यामुळे त्यांनी दरवाजाच्या फटीतून डोकावून बघितले असता, त्यांना निलेश हा गळफास घेतलेल्या अवस्थेत दिसून आला.
मुलाने गळफास घेतल्याचे दिसताच निलेशच्या आईला मोठा मानसिक धक्का बसला आणि त्यांनी एकच आक्रोश केला. त्यामुळे परिसरातील नागरिकांनी तात्काळ त्यांच्या घराकडे धाव घेतली यावेळी मृतदेह खाली उतरावून लागलीच शासकीय वैद्यकीय महाविद्यालय व रुग्णालयात दाखल केले. याठिकाणी वैद्यकीय अधिकाऱ्यांनी तपासणी करीत मयत घोषीत केले. याप्रकरणी जिल्हापेठ पोलीस ठाण्यात अकस्मात मृत्यूची नोंद करण्यात आली आहे.
