अमळनेर : प्रतिनिधी
शहरातील पैलाड भागातील शिवाजी नगरमधील चेतन उर्फ़ सत्तूकिरण धोबी (वय २०) याला उपविभागीय दंडाधिकारी मयूर भंगाळे यांनी ६ महिन्यांकरिता जळगाव जिल्ह्यातून हद्दपार करण्याचे आदेश पारित केले आहेत.
चेतन धोबी यांच्याविरुद्ध पैसे लुटणे, मोबाईल हिसकावणे, शारीरिक दुखापत करून रक्कम लुटणे, गावठी पिस्टल बाळगणे, दुचाकी चोरी आदी प्रकारचे ४ गंभीर गुन्हे दाखल आहेत. त्याच्यापासून शहरातील नागरिकांच्या सुरक्षेस धोका असून गावातील शांतता व कायदा व सुव्यवस्थेस धोका निर्माण झाला आहे म्हणून पो.नि. दत्तात्रय निकम यांनी चेतन धोबी याला जळगाव, धुळे, नंदुरबार जिल्ह्यातून २ वर्षे हद्दपार करण्यासाठी डीवायएसपी विनायक कोते यांच्या मार्फत उपविभागीय दंडाधिकारी मयूर भंगाळे यांच्याकडे प्रस्ताव पाठवला होता. तर मयूर भंगाळे यांनी नोटिस देऊन सुनावणी घेतली. दोन्ही बाजूंचा युक्तिवाद ऐकल्यानंतर महाराष्ट्र पोलीस अधिनियमाप्रमाणे चेतनला ६ महिन्यांसाठी जिल्ह्यातून हद्दपारचे आदेश देण्यात आले आहेत. आदेशाच्या तारखेपासून २ दिवसात त्याला जिल्ह्याच्या हद्दीबाहेर जावे लागणार आहे.
