यावल : प्रतिनिधी
तालुक्यातील आंबापाणी येथे एका ४७ वर्षीय महिलेने फवारणीचे औषध असलेल्या ग्लासामध्ये नजरचुकीने पाणी पिऊन घेतल्याने त्यांना विषबाधा झाली. हा प्रकार निदर्शनास येताच त्यांना तातडीने उपचारार्थ यावल ग्रामीण रुग्णालयात दाखल केले, परंतु डॉक्टरांनी तपासणी करून त्यांना मयत घोषित केले. यावल तालुक्यातील सातपुड्याच्या कुशीत असलेल्या आंबापाणी येथील सायरा मुन्ना पावरा (वय ४७) असे मृत महिलेचे नाव आहे.
ती महिला आपल्या घरी असताना तिने फवारणीचे औषध असलेल्या ग्लासमध्ये नजरचुकीने पाणी प्राशन केल्याने त्यांना विषबाधा झाली. अस्वस्थ वाटत असल्याने त्यांना तातडीने तेथून यावल ग्रामीण रुग्णालयात दाखल केले. तेथे डॉक्टरांनी तपासणी करून त्यांना मयत घोषित केले. याप्रकरणी यावल पोलीस ठाण्यात अकस्मात मृत्यूची नोंद करण्यात आली आहे. तपास पो.नि. रंगनाथ धारबळे यांच्या मार्गदर्शनात पोलीस नाईक वसीम तडवी करत आहेत.
