जळगाव : प्रतिनिधी
जिल्ह्यातील जामनेर नगरपंचायत निवडणुकीदरम्यान प्रभाग क्र. १० मधील एकलव्य शाळा मतदान केंद्रावर आज (सोमवार, दि. २) मोठा गोंधळ उडाला. राष्ट्रवादी काँग्रेस (शरद पवार गट)च्या कार्यकर्त्यांनी बोगस मतदानासाठी आल्याचा संशय असलेल्या एका तरुणाला थेट मतदान केंद्रावरच पकडल्याची घटना समोर आली आहे. या प्रकरणाचा व्हिडिओही सोशल मीडियावर मोठ्या प्रमाणात व्हायरल झाला आहे.
मतदान केंद्र परिसरात काही संशयास्पद हालचाली दिसून आल्याने राष्ट्रवादीच्या कार्यकर्त्यांनी त्या तरुणावर लक्ष ठेवले. त्याच्या वर्तनावर शंका आल्यानंतर त्याला थांबवून चौकशी करण्यात आली. यावेळी संबंधित तरुणाने कॅमेऱ्यासमोरच बोगस मतदानासाठी आल्याची कबुली दिल्याचा धक्कादायक व्हिडिओ समोर आला असून त्यामुळे या प्रकरणाची तीव्रता आणखी वाढली आहे.
यानंतर कार्यकर्त्यांनी संशयित तरुणाला पोलिसांच्या ताब्यात दिले. त्याच्यावर कठोर कारवाई करण्याची मागणी करण्यात आली असून विरोधकांनीही निवडणूक प्रक्रियेत हस्तक्षेप करणाऱ्या अशा प्रकारांवर तातडीने कारवाई करण्याची मागणी केली आहे. पोलिसांनी तरुणाला ताब्यात घेऊन पुढील तपासासाठी पोलीस ठाण्यात हलविल्याने मतदान केंद्रावर काही काळ तणाव निर्माण झाला.
