जळगाव : प्रतिनिधी
विना परवाना वाळूची अवैधरित्या वाहतुक करणारे ट्रॅक्टरवर कारवाई करणाऱ्या राजू कडू बाहे (वय ५३) या ग्राम महसूल अधिकारी (तलाठी) यांची कॉलर पकडून त्यांच्या कानशिलात लगावली. तसेच शिवीगाळ करीत टॉमीने त्यांच्यावर हल्ला करीत जीवेठार मारण्याचा प्रयत्न केला. ही घटना सोमवार दि. १ रोजी दुपारी साडेतीन वाजता खंडेराव नगरात घडली. याप्रकरणी वाळू माफिया मनोज रमेश भालेराव, फैजल खान आणि चालकाविरुद्ध गुन्हा दाखल करण्यात आला आहे.
सविस्तर वृत्त असे कि , शहरातील पिंप्राळ्याचे ग्राम महसूल अधिकारी (तलाठी) म्हणून नियुक्तीस असलेले राजू बाहे हे खंडेराव नगराकडून तलाठी कार्यालयाकडे जात होते. यावेळी गणपती मंदिराजवळून त्यांना विना क्रमांकाच्या ट्रॅक्टरमधून वाळूचा उपसा होत असल्याचे दिसले. त्यांनी वाळूने भरलेल्या ट्रॅक्टर थांबवून चालकाकडे परवान्याबाबत विचारणा केली. यावेळी ट्रॅक्टरच्या मागून दुचाकीवरुन यापुर्वी वाळू वाहतुकीची कारवाई केलेला मनोज भालेराव हा त्याचा मित्र फैजल याच्यासोबत तेथे आला. त्याने तुमचे नेहमीचेच झाले आहे हे ट्रॅक्टर माझेच असून यापुर्वी देखील जमा केले होते असे म्हणत त्याने बुवा म्हणत ट्रॅक्टर घेवून जाण्यास सांगितले. ग्राम महसूल अधिकारी बाहे हे ट्रॅक्टरला आडवे होवून ट्रॅक्टर अडवित असतांना मनोज भालेराव हा त्यांच्या अंगावर धावून गेला. त्याने बाहे यांची कॉलर पकडून त्यांच्या कानशिलात लगावली आणि त्यांना ढकलून दिले. तसेच जोरजोरात अश्लिल शिवीगाळ देखील करु लागला.
ही घटना घडल्यानंतर ग्राम महसुल अधिकारी हे सहकाऱ्यांना फोन करुन सांगत असतांना, त्याठिकाणी नागरिकांनी गर्दी होत असल्याचे दिसताच वाळू माफिये तेथून पसार झाले. ग्राम महसूल अधिकारी यांनी पोलिसात दिलेल्या तक्रारीवरुन संशयित मनोज सुरेश भालेराव, फैजल खान व ट्रॅक्टर चालक यांच्याविरुद्ध गुन्हा दाखल करण्यात आला आहे.
