जळगाव : प्रतिनिधी
मध्य प्रदेशातील बुरहानपूर (कोतवाली) पोलिस ठाण्यात दाखल असलेल्या गुन्हा क्र. २०२/२०२५, बी.एन.एस. कलम ३०३ (२) प्रमाणे रिक्षात प्रवाशी बसवून त्यांचे खिसे कापून चोरी करणाऱ्या प्रकरणाचा तपास करत असताना हा गुन्हा जळगावातील दोन रेकॉर्डवरील गुन्हेगारांनी केल्याचे उघड झाले आहे.
मिळालेल्या माहिती नुसार, या गुन्ह्याबाबत स्थानिक गुन्हे शाखेचे वरिष्ठ पोलीस निरीक्षक श्री. राहुल गायकवाड यांना खात्रीशीर माहिती मिळाल्यानंतर त्यांनी आपल्या अधिनस्त अधिकारी व अंमलदारांना तत्काळ तपास व कारवाईचे आदेश दिले. त्यानुसार, स्थानिक गुन्हे शाखेच्या पथकाने गोपनीय चौकशी व गुप्त बातमीदारांच्या मदतीने या प्रकरणातील संशयित आरोपींचा शोध घेतला. अखेर पथकाने रेकॉर्डवरील गुन्हेगार वसीम कय्युम खाटीक (वय ३३, रा. मास्टर कॉलनी, जळगाव) आणि तौसीफ सत्तार खान (वय ३६, रा. रामनगर, जळगाव) या दोघांना ताब्यात घेतले. सखोल चौकशीत आरोपींनी सदर गुन्हा आपल्या साथीदारांसह केला असल्याची कबुली दिली. त्यांच्या ताब्यातून गुन्ह्यात वापरलेली रिक्षा जप्त करण्यात आली असून दोन्ही आरोपींना पुढील कायदेशीर कारवाईसाठी बुरहानपूर (मध्य प्रदेश) कोतवाली पोलीस ठाण्याच्या पथकाकडे सुपूर्द करण्यात आले आहे.
ही संपूर्ण कारवाई मा. डॉ. श्री. महेश्वर रेड्डी, पोलीस अधीक्षक, जळगाव, मा. श्री. अशोक नखाते, अपर पोलीस अधीक्षक, जळगाव तसेच श्री. राहुल गायकवाड, वरिष्ठ पोलीस निरीक्षक, स्थानिक गुन्हे शाखा, जळगाव यांच्या मार्गदर्शनाखाली करण्यात आली. कारवाईत पोलीस उपनिरीक्षक शरद बागल, तसेच अंमलदार अतुल वंजारी, अकरम शेख, विजय पाटील, नितीन बाविस्कर, प्रविण भालेराव, किशोर पाटील, रविंद्र कापडणे, राहुल रगडे, नाना तायडे आणि महेश सोमवंशी यांनी महत्वपूर्ण भूमिका बजावली.
