यावल : प्रतिनिधी
महामार्गावर फॉरेस्ट नाक्याजवळ एका चारचाकीने दुचाकीला धडक दिली. या अपघातात दुचाकीवरील तिघेही जखमी झाले. मात्र, उपचारादरम्यान महिलेचा मृत्यू झाला. ही घटना बुधवारी घडली. पोलिसांनी चारचाकी वाहन जप्त केले आहे.
मिळालेल्या माहितीनुसार, कासारखेडा येथील रहिवासी रसूल रहिमान तडवी, आलिशान रहिमान तडवी व सलीमा रहीम तडवी हे तिघे दुचाकी (क्र. एम.एच. १९ डी.वाय. ९०४७) वरून यावलहून चोपड्याकडे जात होते. दरम्यान, फॉरेस्ट नाक्याजवळ चारचाकी कार (एम.पी. ०९ डब्ल्यूएल. ३९१५) वरील अज्ञात चालकाने त्यांच्या दुचाकीला जोरदार धडक दिली. या अपघातात तिघेही गंभीर जखमी झाले. तिन्ही जखमींना तत्काळ उपचारासाठी रुग्णालयात हलविण्यात आले. मात्र, अलीशान रहिमान तडवी या महिलेला उपचारादरम्यान प्राण गमवावे लागले. या घटनेबाबत रसूल तडवी यांनी यावल पोलिस ठाण्यात फिर्याद दिली असून पोलिसांनी चारचाकी वाहन ताब्यात घेतले आहे. पुढील तपास पोलिस निरीक्षक रंगनाथ धारबळे यांच्या मार्गदर्शनाखाली सहायक फौजदार विजय पाचपोळे करीत आहेत
