जळगाव : प्रतिनिधी
रामानंद नगर पोलिसांनी माजी मंत्री व आमदार एकनाथराव खडसे यांच्या शिवराम नगर येथील ‘मुक्ताई’ निवासस्थानी झालेल्या घरफोडी प्रकरणाचा उलगडा केला असून, पोलिसांनी तिघांना अटक करून सुमारे ६ लाख ४५ हजार रुपयांचा सोन्या–चांदीचा मुद्देमाल हस्तगत केला आहे.
मिळालेल्या माहिती नुसार, ही घटना २७ ऑक्टोबर रोजी सायंकाळी ७ ते २८ ऑक्टोबर सकाळी ८ वाजेच्या दरम्यान घडली. अज्ञात चोरट्यांनी बंद घराचा कडीकोंडा तोडून सुमारे ६ लाख ७० हजार रुपयांचा मुद्देमाल व ३५ हजार रुपये रोख रक्कम चोरून नेली होती. घराची देखभाल करणारे चेतन सुरेश देशमुख यांनी फिर्याद दिली होती. त्यावरून रामानंद नगर पोलीस ठाण्यात गुन्हा दाखल करण्यात आला.
पोलीस अधीक्षक महेश्वर रेड्डी, अपर अधीक्षक अशोक नखाते, उपविभागीय अधिकारी नितीन गणापुरे यांच्या मार्गदर्शनाखाली पोलीस निरीक्षक राजेंद्र गुंजाळ व स्थानिक गुन्हे शाखेचे निरीक्षक राहुल गायकवाड यांच्या पथकांनी तपास सुरू केला. गोपनीय माहितीच्या आधारे पोलिसांनी चोरीत वापरलेली सुझुकी बर्गमन दुचाकी (क्र. MH-19-ER-5539) शोधून काढली. वाहनमालक जियाउद्दीन हुस्नोद्दीन शेख (३९, रा. मास्टर कॉलनी, जळगाव) याला अटक करण्यात आली.
पुढील तपासात चोरीतील दागिने उल्हासनगर येथील चिराग इकबाल सय्यद (२२) याने कैलास हिराचंद खंडेलवार (४८, रा. कल्याण) या सोनाराला विकल्याचे उघड झाले. दोघांना अटक करून पोलिसांनी ६.२४ लाख रुपये किमतीचे सोन्याचे दागिने व २१ हजार रुपये किमतीची चांदीची मूर्ती असा एकूण ६.४५ लाखांचा मुद्देमाल जप्त केला.
या प्रकरणातील मुख्य आरोपी मोहम्मद बिलाल उर्फ बिल्ला अब्दुल करीम चौधरी, एजाज अहमद उर्फ सलीम अब्दुल चौधरी आणि बाबा (पूर्ण नाव अज्ञात), सर्व रा. उल्हासनगर, मुंबई हे फरार असून त्यांचा शोध सुरू आहे. फरार आरोपींपैकी एजाज अहमद याच्यावर मुंबई व गुजरातमधील विविध पोलीस ठाण्यांत सुमारे २० घरफोडीचे गुन्हे नोंद असल्याचे समोर आले आहे. या कारवाईत रामानंद नगर पोलिस स्टेशन व स्थानिक गुन्हे शाखेच्या पथकांनी परिश्रम घेतले असून पुढील तपास पोउपनि सचिन रणेशवरे हे पोनि राजेंद्र गुंजाळ यांच्या मार्गदर्शनाखाली करीत आहेत.
या यशस्वी कारवाईसाठी पोलीस अधीक्षक महेश्वर रेड्डी, अपर पोलीस अधीक्षक अशोक नखाते, उपविभागीय पोलीस अधिकारी नितीन गणापुरे यांच्या मार्गदर्शनाखाली निरीक्षक राहुल गायकवाड, निरीक्षक राजेंद्र गुंजाळ यांच्या नेतृत्वाखाली पोउपनि सचिन रणेशवरे, तसेच पोलीस हवालदार सुशिल चौधरी, सुधाकर अंभोरे, जितेंद्र राजपूत, विनोद सुर्यवंशी, हेमंत कळसकर, योगेश बारी, अतुल चौधरी, आणि स्थानिक गुन्हे शाखेचे शरद बागल, शेखर डोमाळे, अक्रम शेख, विजय पाटील, प्रविण भालेराव, नितीन बाविस्कर, किशोर पाटील, मुरलीधर धनगर, रविंद्र कापडणे, राहुल रगडे, दिपक चौधरी, बबन पाटील, प्रदीप चौरे, महेश सोमवंशी, कुंदनसिंग बयास आदींनी परिश्रम घेतले. या सर्वांच्या संयुक्त प्रयत्नातून हा गुन्हा उघडकीस आला.
