जळगाव : प्रतिनिधी
आगामी मनपा निवडणूक ही महायुती म्हणूनच लढवली जाणार असून, भाजप, शिंदेसेना व राष्ट्रवादी अजित पवार हे तिन्ही पक्ष एकत्रितपणे निवडणुकीला सामोरे जाणार असल्याची माहिती जलसंपदा मंत्री गिरीश महाजन यांनी दिली. मनपा निवडणुकीत महायुती रेकॉर्डब्रेक जागा जिंकणार असल्याचाही विश्वास त्यांनी यावेळी व्यक्त केला.
शुक्रवारी उद्धव सेनेतील माजी नगरसेवकांचा भाजप प्रवेश गिरीश महाजन यांच्या उपस्थितीत पार पडला, यावेळी झालेल्या पत्रकार परिषदेत महाजन बोलत होते. यावेळी खासदार स्मिता वाघ, आमदार सुरेश भोळे, भाजप महानगराध्यक्ष दीपक सूर्यवंशी आदी उपस्थित होते. गेल्या अनेक महिन्यांपासून उद्धव सेनेतील माजी नगरसेवकांचा बहुचर्चित असलेला भाजप प्रवेश पार पडला. उद्धव सेनेतील माजी नगरसेवकांसह इतर पक्षातून आलेल्या एकूण १५ माजी नगरसेवकांचा व पदाधिकाऱ्यांचा प्रवेश यावेळी पार पडला.
माजी महापौर नितीन लढा, जयश्री महाजन, माजी उप महापौर सुनील महाजन, माजी नगरसेवक प्रशांत नाईक, नितीन बरडे, वर्षा खडके, शबाना खाटिक, चेतन शिरसाळे, राजू अडवाणी, हर्षा सांगोरे, संगीता दांडेकर, जाकीर पठाण, इक्बाल पिरजादे, प्रदीप श्रीश्रीमाळ, रिटा सपकाळे, फिरोज पठाण, संदेश भोईटे, हेमलता नाईक, जितेंद्र मुंदडा, नितीन सपके यांचा प्रवेश झाला.
उद्धव सेनेतील दिग्गज असलेल्या जयश्री महाजन, नितीन लढा, सुनील महाजन, नितीन बरडे व प्रशांत नाईक यांच्यासह इतरांच्या प्रवेशामुळे उद्धव सेनेला आगामी मनपा निवडणुकीच्या पार्श्वभूमीवर सर्वात मोठा धक्का बसला आहे. तर दुसरीकडे या प्रवेशामुळे भाजपला मोठा फायदा होणार आहे. मात्र, मनपा निवडणुकीत जागा वाटप करताना, नव्या व जुन्या पदाधिकाऱ्यांचा निकष पार पाडताना, चांगलीस कसरत भाजपच्या वरिष्ठांना करावी लागणार आहे.
