लाईव्ह महाराष्ट्र न्यूज : जळगाव शहराला हादरवून टाकणाऱ्या घटनेत, वाघ नगर परिसरात सुरू असलेल्या एका अवैध वेश्याव्यवसायाच्या अड्ड्याचा जळगाव पोलिसांनी पर्दाफाश केला आहे. पोलीस उपविभागीय अधिकारी नितीन गणापुरे यांच्या नेतृत्वाखालील विशेष पथकाने शुक्रवारी २४ ऑक्टोबर रोजी सायंकाळी ६ वाजेच्या सुमारास ही धडक कारवाई केली. या कारवाईत पोलिसांनी घटनास्थळावरून तीन महिलांना ताब्यात घेतले आहे. या संदर्भात जळगाव तालुका पोलीस ठाण्यात गुन्हा दाखल करण्याचे काम सुरू आहे.
वाघ नगर भागातील एका विशिष्ट ठिकाणी छुप्या पद्धतीने वेश्याव्यवसाय सुरू असल्याची खात्रीलायक आणि गोपनीय माहिती पोलीस उपविभागीय अधिकारी नितीन गणापुरे यांना मिळाली होती. माहितीची पूर्ण खातरजमा केल्यानंतर त्यांनी त्वरित एक विशेष पथक तयार करून छापा टाकण्याचे आदेश दिले. पथकाने वाघ नगर येथील संशयित ठिकाणी छापा टाकला असता, तिथे तीन महिला आक्षेपार्ह स्थितीत आढळून आल्या. पोलिसांनी तात्काळ या तिन्ही महिलांना ताब्यात घेतले. या कारवाईमुळे वाघ नगर परिसरात एकच खळबळ उडाली आणि अवैध कृत्यांविरुद्ध पोलिसांच्या धडक कारवाईची चर्चा सुरू झाली.
या कारवाईमध्ये अॅन्टी ह्युमन ट्रॅफिकिंग युनिटच्या महिला कर्मचाऱ्यांचाही समावेश होता. त्यामुळे, ताब्यात घेण्यात आलेल्या महिला या पीडित आहेत का, त्यांना या व्यवसायात बळजबरीने आणले गेले होते का, या मानवी तस्करीच्या अँगलनेही पोलीस सखोल तपास करत आहेत. पोलीस उपविभागीय अधिकारी नितीन गणापुरे यांच्या मार्गदर्शनाखाली झालेल्या या कारवाईत पोकॉ सचिन साळुंखे, अवेश शेख, अशोक फुसे तसेच युनिटच्या योगिता नारखेडे आणि मनिषा पाटील यांनी सहभाग घेतला.
मोठी कारवाई; वाघ नगरात अवैध वेश्याव्यवसायाचा पर्दाफाश, तीन महिला जळगाव तालुका पोलीसांच्या ताब्यात
