जळगाव (प्रतिनिधी): धरणगाव तालुक्यातील कवठळ येथील जिल्हा परिषद शाळेतील शिक्षक सुरेश चंद्रा सोनवणे यांना शाळेतच मद्यपान अवस्थेत आढळल्याप्रकरणी जिल्हा परिषदेने कठोर कारवाई केली आहे. ‘लाईव्ह महाराष्ट्र न्यूज’ने या गंभीर प्रकरणाची बातमी प्रकाशित केल्यानंतर प्रशासनाने त्याची तातडीने दखल घेऊन शिक्षकाला निलंबित केले आहे.
जिल्हा परिषदेच्या मुख्य कार्यकारी अधिकारी (सीईओ) मिनल करनवाल यांच्या निर्देशानुसार, पंचायत समिती धरणगावच्या गट विकास अधिकारी यांनी शुक्रवार, १० ऑक्टोबर रोजी निलंबनाचे आदेश जारी केले आहेत. सीईओ करनवाल यांनी या प्राप्त तक्रारीची तत्काळ दखल घेऊन ही कारवाई केली आहे.
नेमके काय घडले?
दिनांक ६ ऑक्टोबर रोजी कवठळ येथील जिल्हा परिषद शाळा बंद अवस्थेत असल्याचे ग्रामस्थांच्या निदर्शनास आले. संतप्त ग्रामस्थांनी याबाबतची माहिती गट शिक्षण अधिकारी, धरणगाव यांना दिल्यानंतर तत्काळ चौकशी सुरू झाली. केंद्र प्रमुखांनी संबंधित शिक्षक सोनवणे यांना नोटीस बजावली असता, ते शाळेत गैरहजर असल्याचे आढळले. या घटनेची गंभीर दखल घेत, गट शिक्षण अधिकारी, केंद्र प्रमुख चांदसर आणि केंद्र प्रमुख पाळधी यांनी ९ ऑक्टोबर रोजी प्रत्यक्ष शाळेला भेट देऊन सखोल चौकशी केली.
गंभीर तक्रारींची नोंद
चौकशीदरम्यान, ग्रामस्थ, पालक, शाळा व्यवस्थापन समितीचे पदाधिकारी आणि सहशिक्षकांनी शिक्षक सुरेश चंद्रा सोनवणे यांच्याविरुद्ध अत्यंत गंभीर स्वरूपाच्या तक्रारी नोंदवल्या. त्यांच्या तक्रारीनुसार, संबंधित शिक्षक वारंवार मद्यपान करून शाळेत येत असत, तसेच ते वर्ग अध्यापन व्यवस्थित करत नव्हते आणि शाळेतून अनधिकृतरीत्या अनुपस्थित राहत असत. या संपूर्ण घटनेचा व्हिडिओ सोशल मीडियावर व्हायरल झाला. त्यामुळे मुख्य कार्यकारी अधिकारी मिनल करनवाल यांनी तातडीने घटनेची दखल घेत, संबंधित शिक्षकाविरुद्ध कठोर कारवाई करण्याचे निर्देश दिले.
‘लाईव्ह महाराष्ट्र न्यूज’च्या बातमीचा दणका; शाळेत मद्यपान करणारा शिक्षक अखेर निलंबित !
