जळगाव : प्रतिनिधी
धुळ्याकडे जाताना दुचाकीला अपघात झाल्याने संतोष चिंतामण चंदासरे (६०) हे जागीच ठार झाल्याची घटना मंगरूळ शिवारात सोमवारी (दि. ६) रात्रीच्या सुमारास घडली.
मिळालेल्या माहितीनुसार, चाळीसगाव तालुक्यातील भामरे गावचे संतोष चंदासरे हे कामानिमित्त अमळनेर शहरात आले होते. ते आपल्या मोटारसायकलने (क्र. एमएच १९ बीएच ४२३०) परत जात असताना मंगरूळच्या वृंदावन हॉटेलच्या पुढे १०० मीटर अंतरावर मोटारसायकल पडून जबर जखमी झाले. त्यांच्या डोक्यातून रक्त वाहू लागले. ते सुमारे अर्धा तास पडलेले होते. हॉटेलमालक किरण पाटील, चेतन पाटील, युवराज सोनवणे, गणू पाटील यांनी त्यांना उचलून ग्रामीण रुग्णालयात दाखल केले. ग्रामीण रुग्णालयात उपचार घेताना त्यांचा मृत्यू झाला.
घटनेचे कळताच हेडकॉन्स्टेबल कैलास शिंदे, काशीनाथ पाटील, पोलिसपाटील भागवत पाटील यांनी घटनास्थळी जाऊन पंचनामा केला.
घटनास्थळावर एक पिकअप व्हॅन बंद अवस्थेत दिसून आली. मात्र वाहनाला धडक लागल्याचे दिसून आले नाही.
