जळगाव : प्रतिनिधी
नवीन बसस्थानकात बसमध्ये चढत असताना एका महिलेच्या गळ्यातील सोन्याचे मंगळसूत्र अज्ञात चोरट्याने लंपास केल्याची घटना शनिवार, ४ ऑक्टोबर रोजी दुपारी १:३० वाजता घडली आहे. चोरीस गेलेल्या मंगळसूत्राची किंमत २२ हजार रुपये असून, या प्रकरणी अज्ञात चोरट्याविरुद्ध जिल्हा पेठ पोलिस ठाण्यात गुन्हा दाखल करण्यात आला आहे.
सुनीता नारायण चौधरी (वय ४०, रा. नशिराबाद, ता.जि. जळगाव) ही मजूर महिला, शनिवारी दुपारी १.३० वाजेच्या दरम्यान जळगाव ते शिंदखेडा बस (एम. एच.१४. बीटी. १८५४) मध्ये चढत होत्या. बसमध्ये प्रवाशांची गर्दी असल्याचा फायदा घेत, अज्ञात चोरट्याने त्यांच्या गळ्यातील चार ग्रॅम वजनाचे सोन्याचे मंगळसूत्र चोरून नेले. चोरी झाल्याचे लक्षात येताच सुनीता चौधरी यांनी तातडीने जिल्हा पेठ पोलिस ठाण्यात धाव घेऊन अज्ञात चोरट्याविरोधात फिर्याद दाखल केली आहे. गेल्या काही दिवसांपासून चोरट्यांनी बसमध्ये चढताना होणाऱ्या गर्दीचा फायदा घेऊन, महिलांचे दागिने चोरीच्या घटना वाढत आहेत.
