मुंबई : वृत्तसंस्था
राज्यातील मनसे अध्यक्ष राज ठाकरे यांनी शिवसेना (उद्धव बाळासाहेब ठाकरे) पक्षप्रमुख उद्धव ठाकरे यांच्या ‘मातोश्री’ निवासस्थानी भेट दिली. ही भेट कौटुंबिक निमित्ताने असली तरी, आगामी मुंबई महानगरपालिका निवडणुकीच्या पार्श्वभूमीवर तिचे राजकीय महत्त्व मोठे मानले जात आहे. लाखो मराठी माणसांच्या मनात दडलेली राज आणि उद्धव यांच्या एकत्र येण्याची इच्छा आता प्रत्यक्षात येण्याची शक्यता वाढली आहे. ही दोन महिन्यांत ठाकरे बंधूंची पाचवी भेट आहे, ज्यामुळे राजकीय वर्तुळात युतीच्या तर्कवितर्कांना वेग आला आहे.
उद्धव ठाकरे यांच्या पक्षाचे खासदार संजय राऊत यांच्या नातूचे नामकरण आज मुंबईतील बीकेसी येथील एका सभागृहात साजरे करण्यात आले. या सोहळ्याला उद्धव ठाकरे आणि राज ठाकरे यांचेही निमंत्रण होते. दोन्ही नेत्यांनी हजेरी लावली आणि कार्यक्रम संपल्यानंतर राज ठाकरे पत्नी शर्मिला ठाकरे यांच्यासह थेट ‘मातोश्री’वर रवाना झाले. जवळपास अर्ध्या तासापेक्षा जास्त वेळ ते तिथे थांबले. या भेटीत ठाकरे बंधूंमध्ये अर्धा तास चर्चा झाली. चर्चेनंतर राज ठाकरे ‘शिवतीर्थ’ बंगल्याकडे रवाना झाले.
राज ठाकरे आणि उद्धव ठाकरे यांच्यात गेल्या १८ वर्षांत राजकीय मतभेदांमुळे दरी निर्माण झाली होती. मात्र, शिवसेना फुटीनंतर दोन्ही नेते मराठी भाषेच्या रक्षणाच्या मुद्द्यावर एकत्र आले. यापूर्वी त्यांनी संयुक्त मेळावा घेतला होता, ज्यात राज ठाकरेंनी राजकीय एकत्र येण्याबाबत बोलणं टाळलं, तर उद्धव ठाकरेंनी ‘आम्ही भाऊ एकत्र येण्यासाठीच इथे आलो आहोत’ असे म्हटले होते. हीच भूमिका त्यांनी पक्षाच्या दसरा मेळाव्यातही पुन्हा सांगितली.
यंदाच्या दसरा मेळाव्यात (१ ऑक्टोबर) राज ठाकरे यांची उपस्थिती अपेक्षित होती, पण ते शक्य झाले नाहीत. तरीही, गणेशोत्सवात उद्धव ठाकरे ‘शिवतीर्थ’वर गेले होते आणि उद्धव यांच्या वाढदिवशी (२७ जुलै २०२५) राज ठाकरे ‘मातोश्री’वर गेले होते. या सततच्या भेटीगाठींमुळे आता BMC निवडणुकीत मनसे-शिवसेना (UBT) युतीची शक्यता जोर धरत आहे.
