जळगाव : प्रतिनिधी
शहरातील महिला महाविद्यालयात पदविचे शिक्षण घेणाऱ्या विद्यार्थीनीशी मोबाईलवर संपर्क करुन रिक्षाचालकाकडून त्रास दिला जात होता. गुरुवारी या रिक्षाचालकाने मुलीला रिक्षात बसवुन खान्देश सेंट्रल येथे नेत अंगलट करण्याचा प्रयत्न केला. परिसरातील नागरीकांनी पोलिसांना पाचारण केल्यानंतर पिडीतेच्या तक्रारीवरुन शहर पोलिस ठाण्यात गुन्हा दाखल करण्यात आला आहे.
मिळालेल्या माहितीनुसार, शहर पोलिस ठाण्याच्या हद्दीत वास्तव्यास असलेली २० वर्षीय तरुणी शहरातील एका महिला महाविद्यालयात पदविचे शिक्षण घेत आहे. या विद्यार्थीनीला गेल्या काही दिवसांपासुन एक रिक्षाचालक मोबाईलवर संपर्क करुन त्रास देत होता. मुलीने माझे लग्न ठरलेले असल्याचे सांगीतल्या नंतरही संशीताकडून त्रास सुरु असतांना मुलीने दुर्लक्ष केले. आज गुरुवार दुपारी साडेबारा वाजता कॉलेज सुटल्यावर पिडीत विद्यार्थीनी बाहेर येताच रिक्षा चालकाने तीला रिक्षात (एमएच.१९.सी.डब्लू. १६५२) बसवुन कोर्ट चौक मार्गे खानदेश सेंट्रल मध्ये नेऊन पिडीत तरुणीसोबत अंगलट करण्याचा प्रयत्न करत असतांना परिसरातील काही तरुणांनी त्यास हटकले. पिडतेची चौकशी नाव गाव विचारल्यावर घडला प्रकार समोर आल्यावर शहर पोलिसांना पाचारण करण्यात आले. पिडीत तरुणीने पोलिसांत तक्रार दिल्यावरुन शहर पोलिसांनी ताब्यात घेतलेल्या सलमान अहमद निजाम (वय २४, रा. गेंदालालमिल) संशयीत रिक्षाचालकाविरुद्ध गुन्हा दाखल करण्यात आला आहे.
