मुक्ताईनगर : प्रतिनिधी
भरधाव डम्परने एसटी बसला जोरदार धडक दिल्याने बसचालकासह १९ प्रवासी जखमी झाल्याची घटना तरोडा ते रुईखेडादरम्यान शनिवारी दुपारी दोन वाजता घडली. या जखमींपैकी सात जणांची प्रकृती गंभीर आहे. त्यांना उपचारासाठी जळगाव येथे शासकीय वैद्यकीय महाविद्यालयात हलवण्यात आले आहे.
सविस्तर वृत्त असे कि, मुक्ताईनगर आगाराची बस ( एमएच- २०, बीएल- २९४४) मुक्ताईनगर-मलकापूर दुपारी मलकापूरकडे जात असताना तरोडा ते रुईखेडादरम्यान गौण खनिजाने भरलेले डम्पर (एमएच ३०, बीडी- २४१८) वेगात समोरून आले आणि बसला जोरदार धडक दिली. धडकेमुळे बसच्या पुढील भागाचे मोठे नुकसान झाले. या अपघातात १९ प्रवासी जखमी झाले असून यात चालकाचाही समावेश आहे. जखमींवर मुक्ताईनगर ग्रामीण रुग्णालयात उपचार करण्यात येत आहेत. दरम्यान, या अपघातप्रकरणी मुक्ताईनगर पोलिस ठाण्यात वाहक अतुल गोविंदा भोजने यांच्या फिर्यादीवरून गुन्हा नोंदवण्यात आला. तर गौण खनिज वाहतूक करणारा संबंधित डम्परचालक फरार आहे. बस अपघातानंतर धडक देणाऱ्या डम्परचा चालक फरार झाला आहे. या अपघातात बसचे मोठे नुकसान झाले आहे.
