भडगाव : प्रतिनिधी
शहरातील यशवंत नगर भागातील २१ वर्षीय अजय गुलाब पवार हा तरुण शेतात कामाला जात असताना समोरून येणाऱ्या कारने ओव्हरटेक करत असताना या दुचाकी स्वरास उडवले. या अपघातात या तरुणाचा जागीच मृत्यू झाला. ही घटना ८ रोजी सायंकाळी पाचोरा रस्त्यावरील भडगाव येथील आरटीओ कार्यालयाजवळ घडली. याबाबत कारचालकाविरुद्ध गुन्हा दाखल करण्यात आलेला आहे.
याबाबत राजेंद्र रामचंद्र मोरे (भडगाव) यांनी फिर्याद दिली आहे. अजय पवार हा दुचाकीने जात असताना कारने त्याला धडक दिली. बराच वेळ तो कारखाली पडून होता. त्याच्या तोंड व नाकावर गंभीर दुखापत झाली होती. त्यानंतर राजेंद्र मोरे व विनोद पांडुरंग मोरे, किशोर भरत मालचे, दादू झुंबर कांबळे यांनी सरकारी दवाखान्यात नेले. अपघातात जखमी अजय पवार हा घटनास्थळी विव्हळत पडलेला होता. याबाबत राजेंद्र मोरे यांना माहिती मिळताच ते घटनास्थळी दाखल झाले. त्यावेळी तो कारखाली पडल्याचे दिसून आले. अजय याला जवळच्या शासकीय रुग्णालयात दाखल करण्यात आले. मात्र डॉक्टरांनी तपासून मयत घोषित केले. भरधाव वेगात गाडी चालवून दुचाकीस्वाराच्या मृत्यूस कारणीभूत ठरल्याप्रकरणी कारचालकाविरुद्ध गुन्हा दाखल करण्यात आला आहे. तपास पोहेकॉ इक्बाल शेख हे करीत आहेत.
