प्रतिनिधी प्रविण पाटील :शहरातील बेंडाळे महिला महाविद्यालयातील विद्यार्थीनी अंशिता गायकवाड हिची नॅशनल ऑल इंडिया पॉवर लिफ्टिंग चॅम्पियनशिप स्पर्धेसाठी निवड करण्यात आली. शनिवारी ३० एप्रिल रोजी प्राचार्या गौरी राणे यांच्याहस्ते तिचा सत्कार करण्यात आला.
जळगाव तालुक्यातील विटनेर येथील प्रगतिशील शेतकरी लक्ष्मण गायकवाड यांची कन्या अंशिता गायकवाड ही विद्यार्थींनी बेंडाळे महिला महाविद्यालयात शिक्षण घेत आहे. शनिवारी ३० एप्रिल रोजी तिची राजस्थान येथील उदयपूर येथे होणाऱ्या ऑल इंडिया पॉवर लिफ्टिंग चॅम्पियनशिप २०२१-२२ साठी कवियित्री बहीणाबाई चौधरी उत्तर महाराष्ट्र विद्यापीठातर्फे महाराष्ट्र संघात निवड झाली असून ती आता राज्याचे नेतृत्व करणार आहे.
अंशिताच्या निवडीबद्दल बेंडाळे महिला महाविद्यालयाच्या प्राचार्या डॉ. गौरी राणे, स्पोर्ट्स विभागाचे प्रमुख अनिता कोल्हे, उपप्राचार्य डॉ.वि.जे.पाटील यांनी अंशिता गायकवाडचा पुष्प गुच्छ देऊन सत्कार केला. या निवडीबद्दल अंशिता हिचे सर्व स्तरातून कौतुक होत आहे
