जळगाव : प्रतिनिधी
शहरात वेगवेगळ्या ठिकाणी अपघातांमध्ये तीन जण जखमी झाले आहेत. या प्रकरणी रामानंद नगर, शनिपेठ व एमआयडीसी पोलिस ठाण्यांत गुन्हा दाखल करण्यात आला आहे.
सविस्तर वृत्त असे कि, नेरी नाका परिसरात २५ जून रोजी भरधाव ट्रकने (एमएच १९ सीवाय ५९४०) दुचाकीला धडक दिली. यावेळी दुचाकीस्वार मधुकर पाटील (७३, रा. तुळसाई नगर) हे खाली कोसळले. मागून येणाऱ्या डंपरचे (एमएच १९ सीवाय ४१८०) चाक वृद्धाच्या हातावरून गेले. त्यामुळे वृद्ध गंभीर जखमी झाले. या प्रकरणी ट्रक व डंपर चालकाविरुद्ध शनिपेठ पोलिस ठाण्यात गुन्हा दाखल करण्यात आला आहे.
या सोबतच रस्ता ओलांडण्यासाठी कडेला उभे असलेल्या शेख मुक्तार मोहंमद शफी पिंजारी (५८, रा. मेहरुण) यांना भरधाव दुचाकीने धडक दिली. त्यात पिंजारी यांच्या पायाला गंभीर दुखापत झाली. हा अपघात २६ जून रोजी झाला. या प्रकरणी जखमीच्या फिर्यादीवरून दुचाकीस्वाराविरुद्ध एमआयडीसी पोलिस ठाण्यात गुन्हा दाखल करण्यात आला आहे. पिंप्राळा हुडको परिसरात २५ जून रोजी भरधाव वाहनाने विजय पाटील (रा. पिंप्राळा) यांना धडक दिली. त्यात ते जखमी झाले. या प्रकरणी जखमीचा मुलगा तुषार पाटील यांच्या फिर्यादीवरून रामानंद नगर पोलिस ठाण्यात गुन्हा दाखल करण्यात आला आहे.
