जळगाव : प्रतिनिधी
गर्दीचा फायदा घेत बसमध्ये चढणाऱ्या ज्योती प्रमोद वाघ (वय ४७, रा. ह.मु. पांडुरंग नगर, मूळ रा. हिवरखेडा, जामनेर) या आरोग्य सेविकेच्या गळ्यातून ७० हजार रुपयांची १३ ग्रॅम वजनाची सोनपोत चोरट्याने चोरुन नेली. ही घटना दि. २१ रोजी दुपारच्या सुमारास नवीन बस स्थानक परिसरात घडली. याप्रकरणी जिल्हा पेठ पोलिसात गुन्हा दाखल करण्यात आला आहे.
सविस्तर वृत्त असे कि, जामनेर तालुक्यातील हिवरखेडा येथील ज्योती प्रमोद वाघ या जिल्हा परिषदेच्या आरोग्य विभागात आरोग्य सेविका असून त्या सद्या त्या जळगावातील पांडुरंग नगरात राहतात. दि. २१ रोजी सुट्टी असल्याने दुपारी गावी जाण्यासाठी बस स्थानकात आल्या. त्या जामनेर बस मध्ये चढत असतांना त्यांना गळ्याजवळ नवीन काहीतरी ओढल्या सारखे जाणवले. मात्र बसमध्ये गर्दी असल्याने त्यांना ओढणी ताणली गेली, असे वाटल्याने त्या बसमध्ये बसून जामनेर येथे गेल्या. त्याठिकाणी पोहचल्यानंतर त्या दुचाकीने पतीसोबत घरी गेल्या. घरी गेल्यानंतर त्यांना जेठाणी उर्मिला वाघ यांनी तुझ्या गळ्यातील माळ कोठे आहे अशी विचारणा केली. त्यावेळी ज्योती वाघ यांनी गळ्याला हात लावून बघितला असता, त्यांना माळ दिसून आली नाही.
गळ्यातील माळ हरविल्याचे लक्षात येताच त्यांनी संपुर्ण परिसरात शोध घेतला. मात्र तरी देखील माळ न मिळून आल्याने त्यांना गर्दीचा फायदा घेत चोरट्यांनी माळ जबरीने चोरल्याची खात्री झाली. त्यांनी लागलीच जिल्हापेठ पोलिसात तक्रार दिली असून त्यानुसार अज्ञात चोरट्याविरुद्ध गुन्हा दाखल करण्यात आला आहे.
