जळगाव : प्रतिनिधी
उपचार करण्यासाठी घेऊन जाते असे सांगून एक अज्ञात महिला ही ज्योतीबाई भगवान बाविस्कर (४७, रा. संत गाडगेबाबा बेघर निवारा केंद्र, जळगाव) या महिलेचे दागिने व मोबाइल घेऊन पसार झाली. हा प्रकार ७ जून रोजी घडला. या प्रकरणी १० जून रोजी जिल्हा पेठ पोलिस ठाण्यात अज्ञात महिलेविरुद्ध गुन्हा दाखल करण्यात आला आहे. नवीन बसस्टँडसमोरील मंदिराजवळ अज्ञात महिला ज्योतीबाई यांना भेटली होती.
मिळालेल्या माहितीनुसार, अज्ञात महिलेने ज्योतीबाई यांना साकेगाव शिवारातील खासगी रुग्णालयात नेले. तेथे त्यांच्याजवळील दागिने, मोबाइल घेऊन पसार झाली. ज्योतीबाई भुसावळ येथे पोलिस ठाण्यात गेल्या असता तिला नशिराबाद पोलिस ठाण्यात जाण्याविषयी सल्ला देऊन त्यांना रिक्षात बसवून देण्यात आले. भुसावळ पोलिसांनी रिक्षात बसविल्यानंतर काहीच समजत नसल्याने ही महिला नशिराबादला न उतरता थेट जळगावला आली. बेघर निवारा केंद्रात त्यांनी ही हकीकत सांगितली. दागिने घेऊन गेलेली महिला परत येईल, या आशेवर प्रतीक्षा करूनही ती न आल्याने ज्योतीबाईने जिल्हा पेठ पोलिस ठाण्यात फिर्याद दिली. त्यावरून अज्ञात महिलेविरुद्ध फसवणुकीचा गुन्हा दाखल करण्यात आला आहे. पुढील तपास पोहेकों वंदना चव्हाण करीत आहेत.
