जळगाव प्रतिनिधी । जळगाव शहरासह इतर जिल्ह्यातील व्यापाऱ्यांना ६० लाखांमध्ये फसवणूक करणाऱ्या दोन जणांविरोधात शहर पोलीस ठाण्यात गुन्हा दाखल करण्यात आला आहे.
अधिक माहिती अशी की, महेंद्र सतिषचंद्र ललवाणी रा. डेमला कॉलनी जळगाव यांचे जी. एस. ग्राऊंडजवळ समर एजन्सीज नावाचे इलेक्ट्रॉनिक्स साहित्य विक्रीचे दुकान आहे. दरम्यान निलेश शांताराम पाटील व दिनेश पाटील या दोघांनी सन २०१३ मध्ये श्री इलेक्ट्रॉनिक्स शॉपी नावाने नाथप्लाझा येथे दुकान सुरु केले होते. हे दोघ ललवाणी यांच्याकडून होलसेल भावात इलेक्ट्रॉनिक्सच्या वस्तू घेवून जात होते. त्यांनी ३१ जुलै २०१३ ते ३१ मार्च २०२१ पर्यंत इलेक्ट्रॉनिक्स वस्तू घेवून रोख व उधारीने घेवून जात होते.
काही वेळा रोख तर काही वेळा उधारीने वस्तू घेवून जात असल्याने त्यांनी ललवाणी यांचा विश्‍वास संपादन केला. दरम्यान त्यांच्याकडे सुमारे ११ लाख ८६ हजार ७३ रुपये बाकी आहेत. त्यांना बाकी असलेल्या पैशांसाठी फोन करुन व त्यांच्या घरी जावून मागणी केली असता, त्यांच्याकडून पैसे देण्यास टाळाटाळ केली जात होती.
महेंद्र ललवाणी यांनी निलेश व दिनेश पाटील या दोघांबद्दल मार्केटमध्ये विचारपूस केली असता ललवाणी यांच्यासह अनेक व्यापार्‍यांना दोघांनी लाखो रुपयांचा गंडा घातल्याचा प्रकार समोर आला. भुसावळ, धुळे , पुणे आणि जळगावातील काही व्यापाऱ्यांना एकुण ६० लाख २२ हजारांची फसवणूक केल्याचे समोर आले. याप्रकरणी महेंद्र ललवाणी यांनी शहर पोलीस ठाण्यात धाव घेवून तक्रार दिली. त्यांच्या तक्रारीवरून शहरपोलीस ठाण्यात दोघांवर गुन्हा दाखल करण्यात आला आहे.
