जळगाव प्रतिनिधी । जोशीपेठेतील सहाय्यक कामगार आयुक्त कार्यालयातील शिपायास लाचलुचपत प्रतिबंध विभागाच्या पथकाने ३० हजाराची लाच घेताना अटक केली आहे. या कारवाईने सहाय्यक कामगार आयुक्त कार्यालयात खळबळ उडाली आहे.
शहरातील जोशी पेठ येथील सहाय्यक कामगार आयुक्त कार्यालयात सिक्युरिटी गार्डच्या नोकरीसाठी जळगाव जिल्ह्यातील तक्रारदाराने अर्ज केला होता. या कार्यालयातील शिपाई गोपाळ कडू चौधरी, (वय-५५) रा. जुना खेडी रोड, डीएनसी कॉलेज, जळगाव याने आपले कार्यालयातील वरिष्ठांशी घनिष्ट संबंध असल्याची बतावणी करत तक्रारदाराचा विश्वास संपादन केला. व नोकरी लावून देतो असे सांगून २ लाख १० हजाराची लाचेची मागणी केली. पहिल्या टप्प्यात सोमवारी ३० हजार रुपये देण्याचे ठरले. यानंतर अर्जदाराने लाचलुचपत प्रतिबंध विभागाकडे तक्रार नोंदवली होती. जळगाव कार्यालयात लाचलुचपत प्रतिबंध विभागाच्या पथकाने सोमवारी ११ एप्रिल रोजी दुपारी सापळा रचत तीस हजारांची लाच स्वीकारताना शिपाई गोपाळ चौधरी याला रंगेहात अटक केली. या कारवाईमुळे सहाय्यक कामगार कार्यालयात एकच खळबळ उडाली होती.
ही कारवाई जळगाव लाचलुचपत विभागाचे पोलीस उपअधीक्षक सतीश भामरे यांच्या मार्गदर्शनाखाली जळगाव लाचलुचपत प्रतिबंध विभागाचे पोलिस उप अधीक्षक शशिकांत पाटील, पोलिस निरीक्षक संजय बच्छाव व पोलीस निरीक्षक एन. एन. जाधव, एसआयएस दिनेशसिंग पाटील, सुरेश पाटील, अशोक पाटील, मनोज जोशी, पोलीस नाईक जनार्दन चौधरी प्रवीण पाटील, कॉन्स्टेबल महेश सोमवंशी, कॉन्स्टेबल नसीर देशमुख, कॉन्स्टेबल ईश्वर धनगर, कॉन्स्टेबल प्रदीप पवार यांनी केली.
