जळगाव : प्रतिनिधी
शिवाजीनगर परिसरात जुन्या वादातून एका तरुणावर चाकू आणि दगडांनी जीवघेणा हल्ला करण्यात आल्याची घटना २३ मे रोजी घडली आहे. यात तरुणाचा पाय फॅक्चर झाला असून, त्याला गंभीर दुखापत झाली आहे. या प्रकरणी, २४ मे रोजी जळगाव शहर पोलिस ठाण्यात तिघांविरोधात गुन्हा दाखल करण्यात आला आहे.
फिर्यादीनुसार गजानन विकास बाविस्कर (वय ३०, रा. शिवाजीनगर, हुडको, जळगाव) हा खासगी कंपनीत नोकरीला आहे. २३ मे रोजी रात्री ९:३० वाजण्याच्या सुमारास, जुन्या वादाच्या कारणावरून मनीष रामू बिन्हाडे, संगम देवा भोई आणि कृष्णा पांडुरंग सोनवणे (सर्व रा. जळगाव) यांनी गजाननला शिवीगाळ करण्यास सुरुवात केली. त्यानंतर, मनीषने चाकूने गजाननच्या डोक्यावर आणि हातावर वार केले. इतर आरोपींनी त्याच्या छातीवर आणि डाव्या पायावर मोठा दगड टाकल्याने, गजाननचा पाय फॅक्चर झाला. या जीवघेण्या हल्ल्यानंतर संशयित आरोपी घटनास्थळावरून पसार झाले.
गंभीर जखमी झालेल्या गजानन बाविस्करला तातडीने जिल्हा शासकीय रुग्णालयात उपचारासाठी दाखल करण्यात आले आहे. या प्रकरणी गजानन बाविस्कर यांनी दिलेल्या फिर्यादीवरून तिन्ही संशयित आरोपींविरोधात जळगाव शहर पोलिस ठाण्यात गुन्हा दाखल करण्यात आला आहे. पुढील तपास पोहेकॉ. ओमप्रकाश सोनी हे करत आहेत.
