जळगाव : प्रतिनिधी
कानळदा-चोपडा रस्त्यालगत आमोदा-घार्डी जवळ कोणतीही परवानगी न घेताच उभारलेल्या गतिरोधकावर दुचाकीला दणका बसून, दुचाकीवरील आईच्या हातात असलेली ५ महिन्याच्या चिमुकलीचा रस्त्यावर पडून दुर्दैवी मृत्यू झाल्याची घटना गुरुवारी सायंकाळी ५ वा. घडली. शुक्रवारी या गतिरोधकावर दुचाकी घसरून एक दाम्पत्यदेखील जखमी झाले.
सविस्तर वृत्त असे कि, संदीप सोनवणे (वय २६, रा. देवगाव, ता. जळगाव) हे कोळन्हावी येथे माहेरी गेलेल्या त्यांच्या पत्नी ज्योती संदीप सोनवणे (वय २२) यांना घेऊन आमोदाकडून देवगावकडे जात होते. आमोदा-घार्डी या गावाजवळ उभारलेल्या गतिरोधकावर संदीप सोनवणे यांची दुचाकी आदळली, त्याचवेळी ज्योती सोनवणे यांच्या हातात असलेली त्यांची पाच महिन्याची चिमुकली गायत्री सोनवणे ही रस्त्यावर पडली चिमुकलीच्या डोक्याला गंभीर मार लागल्याने जिल्हा शासकीय वैद्यकीय महाविद्यालयात दाखल करण्यात आले. मात्र, डॉक्टरांनी तिला मृत घोषित केले.
शुक्रवारी दुपारी १ वाजता याच गतिरोधकावर दुचाकी घसरून दाम्पत्याचा अपघात झाला. या अपघातात निताबाई राजेंद्र पाटील (वय ४१, रा. सावखेडा खु., ता. जळगाव) या गंभीर जखमी झाल्या. त्यांच्यावर जळगाव शहरातील खासगी रुग्णालयात उपचार सुरु आहेत. नियमबाह्य तयार केलेल्या गतिरोधकबाबत कारवाईची मागणी नातेवाईकांकडून करण्यात आली आहे.
