जळगाव : प्रतिनिधी
तालुक्यातील म्हसावद रेल्वे फाटकाजवळ रेल्वे रुळांजवळ दगड ठेवले असल्याचा प्रकार उघडकीस आला आहे. सुदैवाने यामुळे कोणतीही दुर्घटना झाली नसली तरी यामुळे रेल्वेच्या यंत्रणेची चांगलीच धावपळ उडाली होती. रेल्वे फाटकाजवळ रेल्वे थांबल्यानंतर काही प्रवासी खाली उतरले होते. त्यातील एकाने रुळांमधील ही खडी ही रुळावर ठेवल्याचे रेल्वे सुरक्षा बलाचे अधिकाऱ्यांनी सांगितले.
मध्य रेल्वे विभागातील म्हसावद रेल्वे फाटकाजवळील रेल्वे रुळाजवळ आणि रुळावर सोमवारी दगड ठेवलेले असल्याचा प्रकार ट्रॅकमन व काही नागरिकांच्या लक्षात आला. त्यांनी प्रसंगावधान राखत तात्काळ रुळावर ठेवलेले दगड बाजूला करण्यात आले. ही बाब त्यांनी रेल्वेच्या अधिकाऱ्यांना दिली. त्यानुसार रेल्वे सुरक्षा बलाचे अधिकारी, कर्मचारी घटनास्थळी पोहचले. या प्रकारामुळे रेल्वेला कोणताही विलंब झालेला नसून कोणतीही दुर्घटना घडली नसल्याचे रेल्वे सुरक्षा बलाच्या अधिकाऱ्यांनी सांगितले.
हा प्रकार उघडकीय येण्यापुर्वी एक रेल्वे याठिकाणी थांबलेली होती. त्यावेळी काही प्रवासी हे रेल्वेतून उतरुन रुळावर बसले होते. बसलेल्यांपैकी कोणीतरी रुळांमधील खडी उचलून ती रुळावर आणि त्याच्या बाजूला ठेवल्याचा अंदाज रेल्वेच्या सुरक्षा बलाने वर्तविला.
