वरणगाव : प्रतिनिधी
जिल्हा परिषद शाळेतील शिक्षकाने अचानक संन्यास घेण्याचा निर्णय घेतल्याने परिसरात एकच खळबळ उडाली आहे. या निर्णयाला पत्नीने विरोध केला असता संतप्त होऊन शिक्षकाने तिला मारहाण केली. पत्नीने वरणगाव पोलिसात पतीविरूद्ध तक्रार दाखल केली आहे.
सोनाली गोसावी यांनी दिल्या माहिती नुसार वृत्त असे की, भीमराव गोसावी हे दर्यापूर प्राथमिक शाळेत शिक्षक आहेत. त्यांनी संन्यास घेण्याचा निर्णय घेतला. त्यामुळे वाद झाला. त्यानंतर त्यांनी दि. १६ रोजी पत्नीवर हल्ला केला आणि ते फरार झाले. त्याबाबत पत्नीने बेपत्ता झाल्याची तक्रारसुद्धा दाखल केली होती. दोन दिवसांनी गोसावी हे वरणगाव पोलिस ठाण्यात आले आणि त्यांनी घर सोडून मंदिरात राहण्याचा निर्णय घेतल्याचे सांगितले. त्यांनी पत्नीला मारहाण केल्यावर जखमी अवस्थेत पत्नीने वरणगाव पोलिस ठाणे गाठले व पतीविरुद्ध तक्रार नोंदवली. पोलिसांनी तक्रारीच्या आधारे गुन्हा दाखल केला आहे. अधिक तपास वरणगाव पोलिस करीत आहेत.
