जळगाव : प्रतिनिधी
पंधरा वर्षीय अल्पवयीन मुलीवर अत्याचार केल्याने ती गर्भवती राहून तिने एका बाळाला जन्म दिल्याचा धक्कादायक प्रकार समोर आला आहे. विशेष म्हणजे अत्याचार करणारा तरुण नात्यातीलच आहे. ही घटना तालुक्यातील एका गावात घडली. याप्रकरणी अत्याचार करणारा गणेश अशोक बोरसे याला अटक करण्यात आली असून, त्याला ९ एप्रिलपर्यंत पोलिस कोठडी सुनावण्यात आली आहे.
मिळालेल्या माहितीनुसार, तालुक्यातील एका गावात राहणाऱ्या १५ वर्षीय अल्पवयीन मुलीवर तिच्या नात्यातीलच गणेश बोरसे याने गावठाण परिसरातील शेतालगतच्या नाल्याजवळ अत्याचार केला. त्यानंतर याप्रकरणी पोलिसात गुन्हा दाखल झाला. अत्याचार केल्यानंतर तरुणाने अल्पवयीन मुलीला धमकावणे सुरू ठेवत तिच्यावर वेळोवेळी अत्याचार केला. त्यामुळे ती गरोदर राहिली. त्यानंतर तिला शासकीय वैद्यकीय महाविद्यालय व रुग्णालयात दाखल केले असता तिने एका बाळाला जन्म दिला.
याप्रकरणी अल्पवयीन मुलीने तालुका पोलिस ठाण्यात फिर्याद दिली. त्यावरून गणेश बोरसे याच्याविरुद्ध बलात्कार, पोस्को कलमान्वये गुन्हा दाखल करण्यात येऊन अटक करण्यात आली. तपास अधिकारी पोउनि अमोल पवार यांनी त्याला रविवारी (६ एप्रिल) न्यायालयात हजर केले असता ९ एप्रिलपर्यंत पोलिस कोठडी सुनावण्यात आली.
