भडगाव : प्रतिनिधी
भडगाव शिवारात एरंडोल रस्त्यावर बिबट्याचे लहान पिल्लू जखमी अवस्थेत आढळून आले. त्यामुळे या परिसरात बिबट्या मादीचा वावर असावा, असा संशय नागरिकांना आहे. यामुळे शेतकरी, नागरिकांमध्ये भीतीचे वातावरण पसरले आहे. या परिसरात नेहमी बिबट्याचा वावर असल्याचे वेळोवेळी आढळून आले आहे. भडगाव, कृषी विभाग परिसर, पिंपळगाव, आमडदे शिवार या भागांमध्ये बिबट्याचे वेळोवेळी दर्शन झाले आहे. अनेक वेळा पशुधनाला बिबट्याने ठार मारल्याच्या घटना घडल्या आहेत. त्यामुळे नागरिकांमध्ये भीती पसरली आहे.
मिळालेल्या माहितीनुसार, भडगाव-एरंडोल रोडवर बिबट्याचे पिल्लू जखमी अवस्थेत आढळून आल्याची घटना बुधवारी रात्री १२ वाजेच्या सुमारास घडली. या पिल्लावर प्रथमोपचार करून नाशिक येथे पाठविण्यात आले आहे. राष्ट्रवादी काँग्रेसचे जिल्हा कार्याध्यक्ष योगेश देसले हे बुधवारी रात्री भडगावहून एरंडोलकडे जात होते. त्यावेळी भडगाव नजीकच त्यांना रस्त्यातच बिबट्याचे पिल्लू जखमी अवस्थेत दिले. त्यांनी वाहन थांबवून वनविभागाशी संपर्क साधला. त्यानंतर वनपाल नंदू पाटील आणि त्यांच्या सहकाऱ्यांनी घटनास्थळी येत पिल्लावर प्रथमोपचार केले आणि पुढील उपचारासाठी नाशिक येथे पाठवले. वेळीच मदत मिळाल्याने बिबट्याच्या पिल्लाला जीवदान मिळाले आहे.
