जळगाव : प्रतिनिधी
शनिपेठ पोलिस स्टेशनच्या हद्दीतील एका सोन्याच्या दालनात एका ग्राहकाने २२ कॅरेट सोन्याचे दागिने भासवत, ते दालनामध्ये विकून, त्याच्या बदल्यात २ लाख १३ हजार रुपयांचे दागिने घेऊन सोने विक्री दालन मालकाची एकूण १ लाख ७७ हजार रुपयांमध्ये फसवणूक केल्याचा प्रकार ३० मार्चला घडला आहे. या प्रकरणी मनोज हुकूमचंद जैन यांच्या फिर्यादीवरून शनिपेठ पोलिस ठाण्यात एका अज्ञाताविरुद्ध फसवणुकीचा गुन्हा दाखल झाला आहे.
गुढीपाडव्याच्या दिवशी शहरातील एका नामांकित सोने विक्रीच्या दालनात बुधवारी दुपारी १२:३०च्या सुमारास ३० ते ३५ वयोगटांतील एक ग्राहक, सोन्याचे मोड कौंटरवर आला. त्याठिकाणी प्रत्यक्षात ३६ हजार रुपये किमतीची २५ ग्रॅम वजनाची १५.५ टक्के शुद्धता असलेली सोन्याची चेन व पेंडंटवर ९१.६ चा हॉलमार्क मारून ती २२ कॅरेट असल्याचे भासवून, ही चेन त्या सोन्याच्या दुकानात मोडून त्या बदल्यात १ लाख ९४ हजार किमतीचा सोन्याचा हार, १८ हजार रुपये किमतीचे कानातले दागिने व २ ग्रॅम सोन्याचा क्वॉईन असा २ लाख १३ हजार ३४८ रुपयांचे सोने खरेदी करून, सोन्याचे दालन असलेल्या मालकाची एकूण १ लाख ७७ हजार रुपयांमध्ये फसवणूक केली.
