पुणे : वृत्तसंस्था
राज्यात अनैतिक संबंधांतून अनेक ठिकाणी गुन्हेगारी घटना घडत असतांना आता एप्रिल महिन्याच्या सुरुवातील वडगाव मावळ येथून एक खळबळजनक घटना उघडकीस आली आहे. अनैतिक संबंधांच्या संशयातून एका २२ वर्षीय तरुणावर कोयत्याने वार करत त्याची हत्या करण्यात आली आहे. मंगळवार दि. १ एप्रिल रोजी रात्री पावणे आठ वाजण्याच्या सुमारास शनि मंदिराजवळ आंबेवाडी, कान्हे (ता. मावळ) येथे ही घटना घडली. घटनेने परिसरात एकच खळबळ माजली असून या २२ तरुणाच्या हत्येने संपूर्ण मावळ तालुका हादरून गेला आहे. वैभव उमेश सातकर (वय २२, रा. आंबेवाडी, कान्हे) असे हत्या झालेल्या तरुणाचे नाव आहे. याप्रकरणी अंकुश जयवंत सातकर (वय ४२, रा. आंबेवाडी, कान्हे) असे खून केलेल्या आरोपीचे नाव आहे.
वडगाव मावळ पोलिसांनी दिलेल्या माहितीनुसार मयत वैभव सातकर व आरोपी अंकुश सातकर दोघे शेजारी राहत असून मयत वैभव सातकर याचे अनैतिक संबंध असल्याचा त्यांना संशय असल्याने आरोपी अंकुश सातकर याने कोयत्याने वार करत वैभव सातकर याची हत्या केली. थेट मानेवरच वार झाल्याने वैभव याचा जागीच मृत्यू झाला.
दरम्यान, घटनेची माहिती मिळताच वडगाव पोलीस स्टेशनचे पोलीस निरीक्षक कुमार कदम, सहाय्यक पोलीस निरीक्षक शितलकुमार डोईजड, पोलीस उपनिरीक्षक ऋतुजा मोहिते व पोलिसांनी धाव घेतली. मृतदेहाचा पंचनामा करून मृतदेह ताब्यात घेतला. शवविच्छेदन करण्यासाठी रवाना करण्यात आला आहे. पुढील तपास वडगाव मावळ पोलीस करत आहे.
