अमळनेर : प्रतिनिधी
जळोद रस्त्यावर पोलिसांनी छापा टाकून ५६ किलो ९७० ग्रॅम वजनाचा गांजा पकडला. या कारवाईत दोन आरोपींना अटक करण्यात आली असून, वाहनासह एकूण ११ लाख ३९ हजार रुपयांचा मुद्देमाल जप्त करण्यात आला आहे. याबाबत अमळनेर पोलीस ठाण्यात गुन्हा दाखल करण्यात आला आहे.
मिळालेल्या माहितीनुसार, एका पांढऱ्या बोलेरो पिकअप (एमएच १८ एजे ०२२३) मधून गांजा विक्रीसाठी येणार असल्याचे समजले. पोलिस निरीक्षक दत्तात्रय निकम यांच्या मार्गदर्शनाखाली, डीवायएसपी विनायक कोते यांची परवानगी घेऊन आणि तहसीलदार रुपेशकुमार सुराणा यांच्या उपस्थितीत छापा टाकण्यात आला.
२८ मार्च रोजी रात्री १०:५० वाजता पोलिसांनी जळोद रस्त्यावर उड्डाण पुलाजवळ गाडी अडवली. गाडीच्या झडतीत १८ पॅकेटमध्ये भरलेला ओलसर गांजा सापडला. एकूण ५६ किलो ९७० ग्रॅम वजन असलेल्या गांजाची किंमत ११.३९ लाख रुपये इतकी आहे. याप्रकरणी मनोज सोनू पावरा (२४, महादेव सोनपाडा, ता. शिरपूर) आणि सीताराम वेळू सोनवणे (वय ५२, वलवाडी, जि. बडवाणी, मध्यप्रदेश) यांना अटक करण्यात आली. तसेच, गांजा आणि ८ लाख रुपये किमतीची बोलेरो गाडी असा एकूण १९.३९ लाख रुपयांचा मुद्देमाल पोलिसांनी जप्त केला आहे. दोघांवर एनडीपीएस कायदा १९८५ अंतर्गत गुन्हा दाखल करण्यात आला असून, पुढील तपास पोलीस निरीक्षक नामदेव बोरकर करत आहेत.
