पाचोरा : प्रतिनिधी
तब्बल १७ वर्षाच्या सहजीवनानंतर मातृत्वाच्या सरी बरसल्या. जुळ्या मुलांचा जन्म झाल्याची आनंदवार्ता समजल्याने संपूर्ण कुटुंब आनंदात न्हाऊन निघालं… परंतु नियतीच्या मनात काही वेगळचं होतं… काही क्षणात होत्याचं नव्हतं झालं… डोळेही न उघडलेल्या चिमुकल्यांना आईच्या ममत्वापासून पोरकं व्हावं लागलं… जुळ्या बाळांना जन्म दिल्यानंतर अवघ्या तीन तासांतच आईने जगाचा निरोप घेतला.
मिळालेल्या माहितीनुसार, ज्योती ज्ञानेश्वर चौधरी (वय ३८) असे या दुर्दैवी आईचे नाव. उत्राण येथील सासर असलेल्या ज्योती चौधरी या परिवारासह पाचोरा येथे वास्तव्यास होत्या. बाहेरपुरा भागातील माहेर असलेल्या ज्योती यांना लग्नाच्या १७ वर्षानंतर मातृत्वाची चाहूल लागली आणि पती, आई, वडील, भाऊ यांच्यासह नातेवाइकांना आनंद झाला. बुधवारी वेदना होऊ लागल्याने ज्योती यांना पाचोरा येथील खासगी दवाखान्यात दाखल करण्यात आले.
अवघे तीन तास उटल्यानंतर ज्योती यांना छातीत त्रास होऊ लागला. दवाखान्यात एकच धावपळ उडाली आणि सायंकाळी सात वाजण्याच्या सुमारास त्यांना हृदयविकाराचा झटका आला आणि त्यातच त्यांनी जगाचा निरोप घेतला. या दुर्दैवी घटनेने महिलेचा पती, आई, वडील, भाऊ यांनी प्रचंड आक्रोश केला. या घटनेने शहरात हळहळ व्यक्त होत आहे. गुरुवारी पाचोरा येथे अतिशय शोकाकुल वातावरणात त्यांच्यावर अंत्यसंस्कार करण्यात आले.
सायंकाळी चार वाजण्याच्या दरम्यान ज्योती यांचे सिझर झाले. देवाने एक नाही तर मुलगा व मुलगी अशी जुळी मुले पदरात घातली. कुळात एकाचवेळी कन्या आणि पुत्र जन्माला आल्याने सर्वांनाच आनंदाला पारावार उरला नाही. लग्नानंतर १७ वर्षांच्या प्रतीक्षेनंतर आई झालेल्या ज्योती यांनी दोघं जुळ्या मुलांकडे पाहून आनंदाश्रूना वाट करून दिली.
