जळगाव : प्रतिनिधी
दोन महिन्यांपूर्वी नवीन घरात राहण्यासाठी आलेल्या एका ३२ वर्षीय युवकाने राहत्या घरात गळफास घेऊन आत्महत्या केली. ही घटना शुक्रवारी सकाळी ७ वाजता बिबानगर येथे उघडकीस आली. सकाळी पत्नी झोपेतून उठल्यानंतर पतीचा गळफास घेतलेला मृतदेह दिसला. मृतदेह पाहताच पत्नीने आक्रोश केला. यासंदर्भात तालुका पोलिस ठाण्यात अकस्मात मृत्यूची नोंद करण्यात आली आहे.
सविस्तर वृत्त असे कि, समाधान रमेश शिरसाठ (वय ३२, रा. डांगरी, ता.अमळनेर, ह.मु. बिबानगर, जळगाव) असे मयत तरुणाचे नाव आहे. ते महावितरण कंपनीत वायरमन म्हणून नोकरीला होते. समाधान शिरसाठ यांनी घरात सर्वजण झोपलेले असताना राहत्या घरात गळफास घेतला. ही घटना शुक्रवारी सकाळी ७ वाजता त्यांच्या पत्नीच्या लक्षात आली. पत्नीचा आवाज ऐकताच शेजारी असलेले रहिवासी धावत आले. समाधान शिरसाठ यांना शासकीय वैद्यकीय महाविद्यालयात दाखल केले असता मयत घोषित केले. तालुका पोलिस ठाण्यात अकस्मात मृत्यूची नोंद करण्यात आली आहे. त्यांच्या पश्चात आई-वडील, चार विवाहित बहिणी, पत्नी आणि दोन मुले असा परिवार आहे.
