जळगाव : प्रतिनिधी
एका कुत्र्याने बकरीचा चावा घेतला म्हणून, बकरीच्या मालकाने कुत्र्याला चक्क मोटारसायकलला बांधून फरफटत ओढल्याचा संतापजनक प्रकार गुरुवारी सकाळी १०:१५ वाजता डीमार्ट समोर घडला. एका युवकाच्या सतर्कतेमुळे कुत्र्याचा जीव वाचला असला तरी कुत्र्याला ओढत नेल्याने कुत्रा गंभीर जखमी झाला आहे. याप्रकरणी मोटारसायलस्वारावर एमआयडीसी पोलिस ठाण्यात गुन्हा दाखल करण्यात आला आहे.
मिळालेल्या माहितीनुसार, भाग्येश आनंदराव मगर हा युवक शिरसोली रस्त्याने जात असतानाच सलीम अन्सारी (रा.तांबापुरा) हा व्यक्ती एका जीवंत कुत्र्याला (एम.एच.१९, डी.डी. ७८६५) मोटारसायकलला बांधून फरफटत नेत असल्याचे दिसून आले. भाग्येशने सलीम अन्सारीची मोटारसायकल थांबवून, त्याला मोटारसायकलला बांधलेल्या कुत्र्याला सोडण्यास सांगितले.
याप्रकरणी रामानंदनगर पोलिस ठाण्यात दोन अज्ञातांविरुद्ध गुन्हा दाखल करण्यात आला होता. सलीमने ‘माझ्या बकरीला, या कुत्र्याने चावा’ घेतला असल्याचे सांगितले. त्यावेळेस कुत्रा मोठ्या प्रमाणात जखमी झाला असल्याने कुत्र्याला उपचाराची गरज होती. त्यामुळे भाग्येशने सलीमला विनंती करून कुत्र्याला मोकळे केले. त्यानंतर मित्रांच्या सहाय्याने जखमी कुत्र्याला उपचारासाठी महाबळ येथील पशुवैद्यकीय रुग्णालयात दाखल केले. दरम्यान, प्राण्यांच्या छळ केल्याप्रकरणी भाग्येश मगर यांच्या फिर्यादीने सलीम अन्सारी याच्यावर एमआयडीसी पोलिस ठाण्यात गुन्हा दाखल करण्यात आला आहे.
