जळगाव : प्रतिनिधी
शहरातील जुने जळगाव परिसरातील डॉ. बाबासाहेब आंबेडकरनगर भागात बुधवारी सकाळी ९ वाजता एका मालवाहू वाहनाचे नियंत्रण सुटल्याने या वाहनाने पानटपरीला जोरदार धडक दिली. या अपघातात पानटपरीजवळ उभे असलेले ग्राहक आणि टपरी चालक महिला गंभीर जखमी झाले असून, त्यांच्यावर शासकीय वैद्यकीय महाविद्यालय व रुग्णालयात उपचार सुरू आहे.
मिळालेल्या माहितीनुसार, जुने जळगाव परिसरातील डॉ. बाबासाहेब आंबेडकरनगर भागात काँक्रीटीकरणाचे काम सुरू आहे. या काँक्रीटीकरणाच्या कामावर वापरण्यात येणाऱ्या मालवाहू टेम्पोने (एमएच १९-एस ६७७७) बुधवारी सकाळी ९ वाजता रस्त्यावरील पानटपरीला जोरदार धडक दिली. यामध्ये वाहनाचेही मोठे नुकसान झाले आहे. वाहनाने पानटपरीवर उभे असलेले संजय बबन सोनवणे (वय ४५, रा. डॉ. बाबासाहेब आंबेडकरनगर) यांना धडक दिली. तसेच पानटपरीला धडक दिल्यामुळे पानटपरी चालक महिला मराबाई बाबूराव सोनवणे (वय ६०) यांनाही दुखापत झाली. त्यांना लागलीच शासकीय वैद्यकीय महाविद्यालय व रुग्णालयात उपचारासाठी दाखल केले. दोन्ही जखमींची प्रकृती स्थिर आहे.
चालकाने पानटपरीला धडक दिल्यानंतरही गाडीचा वेग नियंत्रणात आणता आला नाही. सुदैवाने वेगात जाणारे वाहन विद्युत खांबाला जाऊन धडकले आणि बंद पडले. जर वाहन रस्त्यालगत गेले असते, मोठा धोका झाला असता. दरम्यान, अपघात घडल्यानंतर गाडीवरील चालकाने पळ काढला असून, पोलिस त्याचा शोध घेत आहेत.
