जळगाव : प्रतिनिधी
शहरातील शिवाजीनगर भागातील हुडको परिसरात एका १४ वर्षाच्या मुलीला पाण्याच्या मोटारीमुळे विजेचा धक्का लागून ती मयत झाल्याची धक्कादायक घटना गुरुवारी सायंकाळी ७ वाजेच्या सुमारास घडली. याप्रकरणी शहर पोलिस स्टेशनला अकस्मात मृत्यूची नोंद करण्यात आली आहे.
सविस्तर वृत्त असे कि, सोनल सुरेश बाविस्कर (वय १४, रा. शिवाजीनगर हुडको, जळगाव) असे मयत बालिकेचे नाव आहे. ती वडील, आजी, आजोबा आणि लहान भाऊ व बहीण यांच्यासह राहत होती. गुरुवारी सायंकाळी नळाला पाणी आले होते. पाण्यासाठी मोटर लावलेली असताना सोनलचा हात मोटरला लागला आणि त्यातून विद्युत प्रवाह असल्यामुळे विजेचा धक्का लागल्याने ती जागीच फेकली गेली. आजूबाजूच्या नागरिकांनी ही घटना पाहताच तिला तात्काळ शासकीय वैद्यकीय महाविद्यालय व रुग्णालयात उपचारासाठी दाखल केले. तेथे वैद्यकीय अधिकाऱ्यांनी तपासून तिला मयत घोषित केले.
यावेळी कुटुंबीयांनी एकच आक्रोश केला. दरम्यान शासकीय रुग्णालयामध्ये शिवाजीनगर परिसरातील नागरिकांनी व नातेवाईकांनी एकच गर्दी केली होती. चिमुकलीच्या अचानक मृत्यूमुळे शिवाजीनगर भागात शोक व्यक्त करण्यात येत आहे.
